Heimamenn voru ekki í miklum vandræðum með Síle í dag. Þeir náðu fljótlega 5-3 forystu og hægt og rólega náðu þeir að byggja upp þægilegt forskot. Mest náðu þeir átta marka forystu en staðan í hálfleik var 18-11.

Síle átti ágætis kafla í síðari hálfleik og minnkaði muninn meðal annars í fimm mörk er tíu mínútur voru eftir. Þeir komust þó ekki nær og Egyptar eru því komnir með tvö stig á heimavelli í Kaíró.

Yehia Elderaa skoraði sex mörk og Akram Yousri skoraði fimm. Yahia Omar bætti við fjórum mörkum. Esteban Salinas var í sérflokki hjá Síle. Hann skoraði átta mörk úr níu skotum.

Egyptar eru því komnir með tvö stig en Síle ekkert. Í riðlinum eru einnig Svíþjóð og Norður Makedónía sem kom inn á síðustu sekúndunum eftir að Tékkar þurftu að hætta við þátttöku vegna kórónuveirusmita.