Körfubolti

Valskonur endurheimta þrjár af þeim bestu í deildinni: Þetta breyttist á 102 dögum

Óskar Ófeigur Jónsson skrifar
Helena Sverrisdóttir og Hildur Björg Kjartansdóttir hafa spilað saman með landsliðinu en hafa verið andstæðingar í félagsliðum. Þegar deildin hefst á ný spilar þær í fyrsta sinn saman með félagsliði. Hér sækir Helena að Hildi þegar þær voru í Val og KR.
Helena Sverrisdóttir og Hildur Björg Kjartansdóttir hafa spilað saman með landsliðinu en hafa verið andstæðingar í félagsliðum. Þegar deildin hefst á ný spilar þær í fyrsta sinn saman með félagsliði. Hér sækir Helena að Hildi þegar þær voru í Val og KR. Vísir/Daníel Þór

Domino´s deild kvenna í körfubolta hefst á nýjan leik í kvöld með heilli umferð. Þetta verða fyrstu leikir deildarinnar í 102 daga.

Vísir kannaði það betur hvaða breytingar hafa orðið á liðunum í deildinni síðan keppni var hætt í byrjun október. Tvö liðanna hafa nú sem dæmi loksins fengið bandaríska leikmanninn sem þau byrjuðu mótið án. Tveir evrópskir leikmenn hafa líka farið á milli íslenskra liða í þessu hléi.

Þrjú lið í deildinni mæta hins vegar með alveg óbreytt lið frá því í haust en það eru lið Skallagríms, Hauka og Keflavíkur.

Kórónuveiran var þegar búin að setja sinn svip á fyrstu umferðir Domino´s deildar kvenna í haust því liðin spiluðu ekki jafnmarga leiki í upphafi móts.

Nýliðar Fjölnis unnu alla þrjá leiki sína en voru bara eitt af þremur liðum sem lék þrjá leiki. Hin voru Haukar og Breiðablik.

Breiðablik vann reyndar einn af þremur leikjum sínum en tapaði honum síðan 20-0 á kæru eftir að hafa notað leikmann sem átti eftir að taka út eins leiks bann síðan að keppni var hætt í mars.

Þessi kæra færði Valskonum líka eina sigur sinn í upphafi móts en Valur spilaði bara tvo leiki eins og Skallagrímur, Snæfell og KR.

Keflavíkurliðið náði hins vegar aðeins að spila einn leik vegna kórónuveirusmits í liðinu en Keflavík vann þann leik og er því eitt af þremur taplausum liðum ásamt Fjölni (3-0) og Skallagrími (2-0).

Valskonur voru ekki sannfærandi í fyrstu tveimur leikjum sínum en hafa nú fengið svaka liðstyrk frá leikjunum í byrjun móts. Þrír af bestu leikmönnum deildarinnar í fyrra eru nefnilega komnar til baka. Hin bandaríska Kiana Johnson missti af leikjunum í haust af því að hún var ekki komin til landsins, Hildur Björg Kjartansdóttir meiddist á fingri og Helena Sverrisdóttir var í barneignarfríi. Allar hafa nú bæst við hópinn.

Það er ljóst að þetta er mikil innspíting í leik Valsliðsins en þessir þrír leikmenn voru saman með 51,8 stig, 24,1 fráköst og 14,6 stoðsendingar að meðaltali á Íslandsmótinu í fyrra. Hildur var þá með KR en hinar tvær með Val.

Tveir evrópskir leikmenn hafa skipt um félög frá því í haust. Fjölniskonur urðu líka að skipta út einum erlenda leikmanni sinum en sú hin sama, Fiona O'Dwyer hafði líka misst af tveimur af þremur leikjum Grafarvogsliðsins í haust. Fiona O'Dwyer óskaði eftir að losna undan samningi og í staðinn fékk Fjölnir hina portúgölsku Söru Djassi.

Búlgarski bakvörðurinn Iva Georgieva byrjaði tímabilið með Snæfelli en er nú kominn til Breiðabliks. Hún fór af landinu en kom aftur eftir áramót og samdi við Blika.

Litháinn Kamile Berenyte færði sig líka um set. Hún byrjaði tímabilið hjá KR en er nú komin til Snæfells. Snæfellsliðið hefur nú líka fengið til sín hina bandarísku Haiden Denise Palmer sem missti af leikjum liðsins í haust.

KR-konur fá hins vegar bæði hina bandarísku Taryn McCutcheon og hina finnsku Anniku Holopainen til baka og auk þess er Ástrós Lena Ægisdóttir komin aftur heim frá Danmörku.

Stöð 2 Sport sýnir tvo leiki í beinni í kvöld. Útsending frá leik Fjölnis og Hauka hefst klukkan 18.05 en útsending frá leik Vals og Skallagríms hefst klukkan 20.10. Báðir leikir eru sýndir á Stöð 2 Sport. Hinir tveir leikir kvöldsins hefjast klukkan 19.15 og eru: Breiðablik-Keflavík og Snæfell-KR.

Hér fyrir neðan má sjá breytingarnar á liðunum átta síðan að deildin var sett í lás í október.

Breytingar á liðum Domino´s deild kvenna:

[Raðað eftir stig og sæti liðanna í deildinni]

  • 1. Fjölnir 6 stig
  • Inn: Sara Djassi
  • Út: Fiona O' Dwyer
  • 2. Skallagrímur 4 stig
  • Engar breytingar
  • 3. Haukar 4 stig
  • Engar breytingar
  • 4. Keflavík 2 stig
  • Engar breytingar
  • 5. Valur 2 stig
  • Inn: Kiana Johnson, Hildur Björg Kjartansdóttir, Helena Sverrisdóttir
  • Út: Auður Íris Ólafsdóttir, Jóhanna Björk Sveinsdóttir
  • 6. Breiðablik 0 stig
  • Inn: Iva Georgieva, Telma Lind Ásgeirsdóttir
  • Út: Hafrún Erna Haraldsdóttir
  • 7. Snæfell 0 stig
  • Inn: Haiden Denise Palmer, Kamilé Berenyté
  • Út: Iva Georgieva
  • 8. KR 0 stig
  •  Inn: Ástrós Lena Ægisdóttir
  • Út: Kamilé Berenyté



Fleiri fréttir

Sjá meira


×