Lífið

„Það sem Edda er að gera er svipað og Google var 1990“

Tinni Sveinsson skrifar
Andri Snær, Edda Sif og Bergur Ebbi.
Andri Snær, Edda Sif og Bergur Ebbi.

Andri Snær Magnason rithöfundur og Edda Sif Pind Aradóttir, forstjóri Carbfix, settust niður með Bergi Ebba Benediktssyni í fyrsta þætti af Framtíðinni.

Bergur Ebbi fjallar um þær tækninýjungar sem eru handan við hornið og þær áskoranir sem standa í vegi fyrir innleiðingu þeirra í þáttunum, sem eru unnir af Orkuveitu Reykjavíkur. Fyrsti þáttur kemur út í dag en alls verða þeir fjórir.

Þurfum veldisvöxt í öllum okkar loftslagsaðgerðum út þessa öld

Edda Sif stýrir fyrirtækinu Carbfix, sem vinnur nú hörðum höndum að því að fanga og binda koldíoxíð varanlega í bergi.

„Það sem Edda er að gera er svipað og Google var árið 1990. Sá sem lærir eitthvað í tengslum við þetta á eftir að fá alveg fullt að gera,“ segir Andri Snær meðal annars. Einnig þylur hann upp hversu umfangsmikil kolefnislosun mannsins er á hverjum einasta degi.

„Ef þið horfið á það sem er verið að gera hér á Hellisheiði þá þarf umfangið að vera að minnsta kosti milljón sinnum meira á heimsvísu til þess að við getum byrjað að höggva í losun mannsins.“

Klippa: Framtíðin - Andri Snær og Edda Sif

Edda Sif segir að berg sé nú þegar stærsta kolefnisgeymslan á jörðinni og geymslumöguleikarnir séu miklir.

„Ef við tökum basalt sem dæmi, sem er algengasta bergtegundin, þá getum við geymt mun meira þar en við þurfum. Verkefnið er gríðarlegt og við þurfum veldisvöxt í öllum okkar loftslagsaðgerðum á hverju einasta ári út þessa öld.“

Hægt er að horfa á viðtalið við þau Andra Snæ og Eddu Sif í spilaranum hér fyrir ofan. Einnig er hægt að sjá þáttinn í fullri lengd og fræðast nánar um verkefnið hér.






Fleiri fréttir

Sjá meira


×