Erlent

Wil­bek í­hugar að bjóða sig fram til vara­for­mennsku

Atli Ísleifsson skrifar
Ulrik Wilbek stýrði danska karlalandsliðinu í handbolta á árunum 2006 til 2014.
Ulrik Wilbek stýrði danska karlalandsliðinu í handbolta á árunum 2006 til 2014. Getty

Ulrik Wilbek, borgarstjóri Viborg í Danmörku og fyrrverandi þjálfari danska karlalandsliðsins í handbolta, segist nú íhuga að bjóða sig fram til varaformennsku í Venstre.

Þetta segir hann í samtali við Viborg Stifts Folkeblad. „Ég hef fengið mikla hvatningu og þetta er eitthvað sem ég vil skoða,“ segir Wilbek.

Embætti varaformanns í Venstre er nú laust eftir að formaður flokksins, Jacob Ellemann-Jensen, bað Inger Støjberg, fyrrverandi ráðherra innflytjendamála, að hætta. Sagði Elleman-Jensen að Støjberg hafi ítrekað gengið og talað gegn línu formannsins. Þau gætu ekki unnið saman lengur.

Ulrik Wilbek setur þó þrjú skilyrði fyrir því að hann myndi taka varaformennskuna að sér: Að hann muni áfram starfa sem borgarstjóri Viborg, að varaformaður yrði ekki eins áberandi og hann var í varaformennskutíð Støjberg og svo að það verði ekki kosningabarátta um nýjan varaformann, það er að hann yrði sjálfkjörinn.

„En ef við ætlum að hafa stjórn á flokknum, þá verður auðvitað einhver að bjóða sig fram,“ segir Wilbek.

Wilbek stýrði lengi danska landsliðinu, en árið 2014 tók Guðmundur Guðmundsson við liðinu. Guðmundur stýrði danska liðinu til Ólympíugulls á leikunum í Rio de Janeiro árið 2016, en mikið var þá fjallað um að Wilbek reynt að grafa undan Guðmundi á leikunum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×