Má ekki tjá sig um samband sitt við Monty

Breska fyrirsætan Paula Tagg má á engan hátt tjá sig við fjölmiðla um samband sitt við breska kylfinginn Colin Montgomerie.

Monty var að slá sér upp með Tagg árið 2006 og er hermt að hún hafi ætlað að selja sögu sína til breska slúðurblaðsins News of the World.

Montgomerie fór fram á það við dómstóla að henni yrði meinað að tjá sig um persónulega hluti í sambandinu við fjölmiðla og hefur nú unnið það mál.

Tagg má því ekkert tjá sig um sambandið, kynlífið né birta myndir. Hún má ekki einu sinni segja frá því hvort hún eigi myndir eða myndbönd í vafasamari kantinum.

Bandarískir blaðamenn spurðu Monty um málið í aðdraganda PGA-meistaramótsins en gamla kempan neitaði að tjá sig.