Aðaleigandi Sjóvár kaupir 20% í viðbót

SF1 slhf., félag í eigu lífeyrissjóða auk annarra fagfjárfesta, hefur nýtt sér kauprétt á 20,6% eignarhluta Eignasafns Seðlabanka Íslands ehf. (ESÍ) í Sjóvá-Almennum tryggingum hf. (Sjóvá). SF1 eignaðist meirihluta í Sjóvá fyrir rúmu ári með kaupum á 52,4% hlut af ESÍ og þá var einnig samið um framangreindan kauprétt. Eftir nýtingu á kaupréttinum hefur SF1 keypt allan eignarhlut ESÍ í Sjóvá eða samtals 73% og hafa kaupin þegar hlotið samþykki Fjármálaeftirlitsins og Samkeppniseftirlitsins.

„Félagið er að okkar mati mjög áhugaverður fjárfestingarkostur. Ákvörðun SF1 um að nýta kaupréttinn undirstrikar sannfæringu okkar fyrir því að aðgerðir félagsins síðustu misseri hafi verið réttar og að mikil tækifæri séu framundan. Við munum áfram vinna rösklega að því að móta fyrirtækinu nýja stefnu til að búa það sem best undir tækifæri og kröfur framtíðarinnar. Jafnframt verður lögð áhersla á að Sjóvá haldi áfram að bjóða viðskiptavinum sínum trausta og góða þjónustu. Ennfremur er stefnt að því að skrá fyrirtækið á markað seinni hluta næsta árs," sagði Erna Gísladóttir, formaður stjórnar SF1 og stjórnarformaður Sjóvár, þegar gengið var frá kaupunum.

Sjóvá er alhliða vátryggingafélag með rúmlega 28% markaðshlutdeild og um 70 þúsund viðskiptavini.