Þórir kominn með norsku stelpurnar í úrslitaleikinn á ÓL í London

Þórir Hergeirsson heldur áfram að gera frábæra hluti með norska kvennalandsliðið í handbolta en hann stýrði nú áðan norska kvennaliðinu inn í úrslitaleikinn um gullið á Ólympíuleikunum í London.

Norsku stelpurnar unnu þá sex marka sigur á Suður-Kóreu, 31-25, í undanúrslitunum og mæta annaðhvort Spáni eða Svartfjallalandi í úrslitaleiknum á laugardaginn.

Heidi Löke var markahæst í norska liðinu með 8 mörk, Kristine Lunde-Borgersen átti stórleik og skoraði 6 mörk og Linn Jörum Sulland var með 4 mörk. Gwon Han-Na var markahæst hjá Suður-Kóreu með 7 mörk.

Norsku stelpurnar voru í miklum ham frá fyrstu mínútu því þær komust í 3-1, 7-3, 10-6 og 15-10 en kóreska liðið náði muninum niður í þrjú mörk, 18-15, fyrir hálfleik.

Norska liðið byrjaði seinni hálfleikinn vel og náði aftur fjögurra marka forskoti, 20-16 og svo seinna sex marka forskoti, 26-20. Norska liðið var með góð tök á leiknum og vann á endanum xx marka sigur.

Þórir er þegar búinn að gera norska liðið að Heims- og Evrópumeisturum sem aðalþjálfari og er nú aðeins einum sigri frá því að ná þrennunni fyrstu íslenskra þjálfara.

Noregur vann Ólympíugull á leikunum í Peking fyrir fjórum árum síðan en þá var Þórir aðstoðarþjálfari Marit Breivik.