Skattkerfið og fjármagnskostnaður helstu hindranirnar

Lítil og meðalstór fyrirtæki á Íslandi telja að skattkerfið og hár fjármagnskostnaður séu helstu hindranirnar fyrir vexti þeirra á næstu árum. Þar á eftir koma skortur á fjármagni og hæfu starfsfólki, ásamt gjaldeyrishöftum, reglubyrði og lítilli eftirspurn á markaði.

Þetta kemur fram í nýrri könnun sem gerð var vegna Smáþings 2013 sem fer fram á morgun.

Í fréttatilkynningu á heimasíðu Samtaka atvinnulífsins segir að frekari niðurstöður úr könnuninni verði birtar á Smáþinginu þar sem koma fram horfur um fjölgun starfa hjá litlum og meðalstórum fyrirtækjum hér á landi á næstu þremur til fimm árum.