Martin með stórleik gegn Olympiacos

Martin Hermannsson átti flottan leik þegar Alba Berlin vann gríska stórliðið Olympiacos, 86-93, í EuroLeague í körfubolta í kvöld.

Martin skoraði 18 stig og var næststigahæstur í liði Alba Berlin. Hann gaf einnig sex stoðsendingar, flestar í liði Þjóðverjanna.

.@hermannsson15 was BIG as @albaberlin came away with a valuable road W! #GameONpic.twitter.com/Vvx8IdGsCp

— Turkish Airlines EuroLeague (@EuroLeague) January 14, 2020

Þetta var sjötti sigur Alba Berlin í EuroLeague í vetur. Tveir þeirra hafa komið gegn grísku liðunum Olympiacos og Panathinaikos.

Martin átti stórleik þegar Alba Berlin vann Panathinaikos fyrr í vetur og var með 20 stig og tíu stoðsendingar.

Góðvinur Martins og félagi í íslenska landsliðinu, Elvar Már Friðriksson, lék vel þegar Borås Basket vann öruggan sigur á Nässjo, 86-60, í sænsku úrvalsdeildinni.

Elvar skoraði 15 stig, tók fjögur fráköst og gaf níu stoðsendingar. Hann var stoðsendingahæstur á vellinum.

Þetta var þriðji sigur Borås í röð. Liðið er með tveggja stiga forskot á toppi deildarinnar.