Skógrækt bætir lífsgæði

Ræktun útivistarskóga í grennd við þéttbýli hefur verið eitt helsta verkefni skógræktarfélaganna í gegnum tíðina og blasir árangurinn nú við víða um land. Í útmörkum höfuðborgarsvæðisins og við fjölmörg þorp og bæi standa myndarlegir skógarreitir sem bera öflugu starfi fyrri kynslóða skógræktarmanna fagurt vitni. Skógarnir eru sannkallaðir sælureitir í augum íbúa þar sem þeir geta stundað fjölbreytta útivist, gert sér glaðan dag með vinum og fjölskyldu eða fundið frið og ró í faðmi náttúrunnar. Fólk kann að meta skógana enda stuðla slíkar gróðurvinjar, í og við þéttbýli, að líkamlegri sem andlegri vellíðan.

Skapa skjól fyrir byggð

Skógrækt í grennd við þéttbýli hefur einnig góð áhrif á umhverfið og bætir með því enn frekar lífsgæði íbúa. Skógarnir skapa skjól fyrir veðri og vindum og með markvissri ræktun skógarreita og skjólbelta má jafnvel draga verulega úr vindálagi í nærliggjandi byggðum. Skógrækt er jafnframt sterkasta vopnið í baráttunni gegn uppblæstri og gróðureyðingu. Þessa sér nú þegar víða stað á umráðasvæðum skógræktarfélaganna þar sem fjölbreyttur gróður hefur tekið við af örfoka melum og uppblásnum rofabörðum. Jafnframt stuðlar skógræktin að bættum vatnsbúskap, bindur koltvísýring úr andrúmslofti og fegrar umhverfið svo fátt eitt sé nefnt.

Jólatrjáasala styrkir skógrækt

Það krefst mikillar þolinmæði, umönnunar og alúðar að rækta góðan útivistarskóg. Hirða þarf um skóginn og grisja og byggja upp aðstöðu ásamt því að leggja stíga og vegi til að fólk fái notið hans betur. Öllum þessum þáttum sinna skógræktarfélögin í landinu í góðri samvinnu við sveitarfélögin.

Umhirðunni fylgir talsverður kostnaður sem skógræktarfélögin standa að miklu leyti straum af sjálf. Til að mæta honum hafa sum þeirra gripið til þess ráðs að selja jólatré, ýmist til annarra söluaðila eða á eigin vegum. Mörg félög bjóða fólki að koma í skóginn og höggva tré að eigin vali og eru slíkar heimsóknir orðnar ómissandi liður í jólaundirbúningi margra fjölskyldna.

Ætla má að fyrir hvert selt tré sem skógræktarfélögin selja sé hægt að gróðursetja 30-40 ný tré. Með því að kaupa jólatré af skógræktarfélögum stuðlar fólk því að ræktun útivistarskóga í heimabyggð sinni og þar með að bættum lífsgæðum fyrir sig og afkomendur sína.