Leiðréttu leiðréttinguna - Sigmundur segir ætihvönnina virka

„Þetta kom okkur á óvart, við fengum ágætiskynningu á Saga Pro á fimmtudagskvöldinu á RÚV," segir Sigmundur Guðbjarnason, fyrrverandi háskólarektor, sem stendur fyrir rannsóknum á Íslenska náttúrulyfinu SagaPro, sem er framleitt úr ætihvönn, í viðtali við Reykjavík síðdegis í dag.

Fréttastofa RÚV greindi frá því á fimmtudaginn að ætihvönnin virkar gegn tíðum þvaglátum en Sigmundur segir að fréttin þá hafi verið einstaklega vel unnin. Þannig var greint frá því að það væri Saga Medica sem þróaði lyfið sem kom fyrst á markað fyrir sjö árum. Fljótlega kom í ljós að það hafði góð áhrif á þá sem áttu við tíð þvaglát að stríða. Rannsóknir hefðu nú staðfest það.

Það kom hinsvegar Sigmundi töluvert á óvart þegar daginn eftir birtist leiðrétting á fyrri fréttinni. Þá var greint frá því í fréttum RÚV að frásögnin væri ónákvæm, því rannsóknin sýndi fyrst og fremst að lyfið væri hættulaust.

Sigmundur segir að þetta hafi aldrei verið borið undir hann, heldur hefði einhver hringt inn á fréttastofu og viljað fá þetta leiðrétt.

„En svo var þetta aftur leiðrétt daginn eftir," segir Sigmundur en það var þá þriðji dagurinn sem fjallað var um rannsóknina. Sigmundur segir að það sé ljóst að lyfið virkar á þann hóp sem hafi ofvirka blöðru, lyfið jók semsagt ummál blöðrunnar sem dró úr tíðum þvaglátum yfir nóttina.

Sigmundur segir að margir úr læknastéttinni hafi hjálpað þeim og stutt þessar rannsóknir, „en við eigum líka andstæðinga í þeim hópi," bætti hann við. Sigmundur segist hafa horft á athyglisverða leikna heimildarmynd á RÚV í gærkvöldi, sem fjallaði um franska efnafræðinginn Louis Pasteur. Sá lagði grunninn að gerilsneyðingu og gerði einnig mikilvægar rannsóknir á sviði örverufræða í tengslum við sjúkdóma sem þær valda. Sá var mjög umdeildur. Sigmundur segir það aldrei auðvelt að vera brautryðjandi.

Hægt er að hlusta á athyglisvert viðtal við Sigmund, þar sem hann útskýrir einnig rannsóknina sem gerð var og niðurstöðurnar byggja á, í Reykjavík síðdegis.