Internetið tekur fram úr sjónvarpinu

Internetið hefur tekið sæti sjónvarpsins sem áhrifamesti auglýsingamiðillinn á Íslandi samkvæmt niðurstöðum árlegrar rannsóknar Gallup meðal markaðsstjóra stærstu auglýsenda landsins.

Í rannsókninni svöruðu 231 markaðsstjóri ýmsum spurningum um auglýsingamarkaðinn á Íslandi. Um fjórðungur þeirra taldi internetið, þar með talið samfélagsmiðla, áhrifamesta auglýsingamiðilinn á Íslandi. Í fyrri rannsóknum Gallup undanfarin ár hafa markaðsstjórar talið sjónvarp áhrifamesta miðilinn til að ná til markhópa sinna.

Hefur internetið sótt mikið á en í sambærilegri rannsókn Gallup frá árinu 2009 sögðust aðeins 15 prósent markaðsstjóra að internetið væri áhrifamesti auglýsingamiðilinn. Hefur internetið því heldur betur sótt í sig veðrið og orðið æ áhrifameira að mati markaðstjóra hér á landi.

Um þriðjungur þeirra telur sjónvarpið þó enn vera áhrifaríkasta auglýsingamiðilinn. Hefur þetta hlutfall lækkað undanfarin ár en árið 2009 taldi ríflegur helmingur markaðstjóra sjónvarpið vera áhrifamesta auglýsingamiðilinn.

 

 

Samfélagsmiðlar sækja á

Í blaðinu Ímark sem fylgdi Morgunblaðinu í morgun er rætt við Guðna Rafn Gunnarsson, sviðsstjóra fjölmiðlarannsókna hjá Gallup. Segir hann að samfélagsmiðlar séu ofarlega í huga markaðsstjóra þegar kemur að markaðssetningu á netinu.

„Áhrifamáttur netsins sem auglýsingamiðill í hugum auglýsenda hefur aukist jafnt og þétt síðustu ár frá því að vera nefnt af um sjö prósentum svarenda fyrir áratug,“ segir Guðni. „Af þeim sem telja neti áhrifaríkast nefndi helmingur svarenda samfélagsmiðla og helmingur nefndi aðra auglýsingakosti á netinu.“

Guðni kynnti niðurstöður rannsóknarinnar á Íslenska markaðsdeginum sem nú stendur yfir í Háskólabíói. Í kvöld verða svo Íslensku auglýsingaverðlaunin afhent en þau eru veitt í fjölmörgum flokkum til þeirra sem þótt hafa skarað framúr í auglýsinga- og markaðsmálum árið 2015.