Var undir áhrifum fíkniefna og áfengis

Bobbi Kristina Brown, dóttir Whitney Houston og Bobby Brown, lét lífið eftir að hafa verið of lengi á kafi í vatni og vegna fíkniefnaneyslu. Þetta eru niðurstöður réttarmeinafræðings, en þær voru birtar fyrst núna í dag. Bobbi Kristina fannst meðvitundarlaus í baðkari á heimili sínu í janúar í fyrra og lést á sjúkrahúsi í júlí.

Hún var 22 ára gömul.

Samkvæmt AP fréttaveitunni voru læknaskýrslur skoðaðar auk rannsóknargagna og fleiri gagna. Samkvæmt niðurstöðunum var Bobbi Kristina undir áhrifum áfengis og kannabisefna þegar hún dó. Þar að auki hafði hún tekið róandi lyf sem ætluð eru gegn kvíða.

Fjölmiðlar ytra höfðu farið fram á að niðurstöðurnar yrðu birtar opinberlega og dómari samþykkti það í gær.