Danskur framherji æfir með Grindavík | Mikil óvissa með Ameobi

Jimmy Mayasi, 25 ára framherji frá Danmörku, æfir í dag með Pepsi-deildarliði Grindavíkur. Þetta staðfesti Eiríkur Leifsson, framkvæmdastjóri knattspyrnudeildar við Vísi í dag.

Mayasi, sem á ættir að rekja til Kongó, var síðast á mála hjá Tarxien Rainbows á Möltu þar sem hann skoraði fjögur mörk í sextán leikjum.

Áður var Mayasi á mála hjá Skive og AC Horsens í danska boltanum.

Töluverð meiðsli eru í herbúðum Grindvíkinga. Tomi Ameobi reyndi að æfa með liðinu í gær en þurfti að hætta vegna verkja. Mikil óvissa ríkir hvort hann spili frekar með liðinu á tímabilinu.

Luic Ondo, sem var ekki í leikmannahópi Grindvíkinga í 1-0 tapinu gegn FH, hefur hins vegar æft og verður líklega í hópnum gegn Keflavík á mánudag.

Pape Mamadou Faye á enn í töluverðum vandræðum vegna meiðsla á mjöð.

Iain Williamson, skoski leikmaðurinn sem gekk til liðs við Grindavík á lánssamningi fyrr í vikunni, hefur vakið lukku heimamanna. Hann þykir góður sendingamaður og ætti að styrkja botnliðið í baráttunni sem framundan er.