Eggjum grýtt í Justin Bieber

Kanadíska poppstjarnan Justin Bieber verður tekinn fyrir í svokölluðum „roast“ grínþætti á bandarísku sjónvarpsstöðinni Comedy Central sem sýndur verður þann 30. mars. Í þáttum sem þessum fá hópar orðheppinna grínista að láta tiltekinn frægan einstakling fá það óþvegið áður en hann svarar svo fyrir sig. Allt í góðu gríni þó.

Margir bíða þáttarins með mikilli eftirvæntingu en Comedy Central hefur sent frá sér stutt myndskeið til að minna á að frumsýning hans nálgast. Atburðarásin í myndskeiðinu er ekki flókin, Bieber stillir sér upp, berum að ofan, fyrir framan myndavél og eggjum er kastað í hann.

Með þessu er verið að vísa til þess þegar Bieber var handtekinn fyrir að kasta eggjum í hús nágranna síns í fyrra, þá nítján ára gamall. Sjá má myndskeiðið í spilaranum hér fyrir neðan.

Innlegg frá Comedy Central.