Erilsöm nótt hjá lögreglu - ætlaði að henda sér í sjóinn

Lögreglunni á höfuðborgarsvæðinu bárust tvær tilkynningar um líkamsárásir í nótt. Annarsvegar var ráðist á dyravörð í Keiluhöllinni, en um minniháttar atvik var að ræða. Svo var karlmaður sleginn hnefahöggi á Ingólfstorgi snemma í morgun. Ekki er vitað hver var þar að verki en sá sem varð fyrir högginu var fluttur á slysadeild til skoðunar.

Um klukkan hálf þrjú í nótt var lögreglu svo tilkynnt um mann sem hugðist kasta sér í sjóinn við höfnina í miðborg Reykjavíkur. Lögreglan fór strax á vettvang og fannst maðurinn eftir nokkra stund við Austurbakka, þar sem hann hafði vaðið upp að mitti út í sjó. Lögreglan náði manninum úr sjónum og var hann því næst fluttur á spítala til skoðunar og aðhlynningar.

Það var síðan um hálf fjögur í nótt sem ekið var á gangandi vegfaranda í Bankastrætinu. Sá meiddist á fæti en ökumaður stakk af. Erilsamt var hjá lögreglunni í nótt.