Heiðari létt vegna niðurstöðunnar - Seðlabankinn ósáttur

„Þetta er ákveðinn léttir en ég átti ekki von á annarri niðurstöðu," segir Heiðar Már Guðjónsson fjárfestir um niðurstöðu sérstaks saksóknara og ríkissakóknara um að fella niður mál gegn honum. „Mér finnst þetta hryggilegt fyrir seðlabankann því það kemur í ljós að hans aðfinnslur að mínum málum eru algjörlega tilefnislausar," bætir Heiðar Már við.

Heiðar Már segist aldrei hafa skilið út á hvað umrætt mál gekk en mestu máli skipti sé að nú hafi sérstakur saksóknari og ríkissaksóknari látið málið niður falla. Hann vonast til að hann geti haldið áfram að stunda viðskipti en segist lítið hafa getað aðhafst síðan rannsókn málsins hófst.

„Það er ekkert grín ef seðlabanki einhversstaðar sakar mann um misferli. Seðlabankar eru þannig stofnanir að þær njóta óskoraðs trausts. Það er mjög erfitt fyrir einstaklinga að eiga við seðlabanka. Í þessu tilfelli var ég einhvern veginn dæmdur fyrir fram vegna þess að seðlabanki lands var að segja að ég hefði brotið af mér," segir Heiðar Már í viðtali.

Í yfirlýsingu sem Seðlabankinn hefur sent frá sér segir að bankinn fallist ekki á rökstuðning fyrir afstöðu embættis ríkissaksóknara og hefur óskað eftir fundi með ríkissaksóknara þar sem farið verður yfir málið. Það er afstaða Seðlabankans að fullt tilefni hafi verið til að vísa málunum til lögreglu.

Yfirlýsing Seðlabankans hljóðar svo í heild:



„Í nóvember 2010 vísaði gjaldeyriseftirlit Seðlabanka Íslands til efnahagsbrotadeildar Ríkislögreglustjóra 4 málum sem vörðuðu skuldabréfaútgáfur sem grunur lék á að færu í bága við ákvæði reglna sem Seðlabanki Íslands hafði sett um gjaldeyrismál. Í september 2011 var efnahagsbrotadeild Ríkislögreglustjórans lögð niður og málin færðust til embættis sérstaks saksóknara.

Í febrúar 2012 tók embætti sérstaks saksóknara ákvörðun um að hætta rannsókn málanna meðal annars vegna erfiðleika við að afla sönnunargagna erlendis frá. Seðlabankinn kærði þá ákvörðun til ríkissaksóknara. Ríkissaksóknari hefur nú tekið afstöðu í málinu og staðfest ákvörðun sérstaks saksóknara.

Seðlabankinn fellst ekki á rökstuðning fyrir afstöðu embættis ríkissaksóknara og hefur óskað eftir fundi með ríkissaksóknara þar sem farið verður yfir málið.

Það er afstaða Seðlabankans að fullt tilefni hafi verið til að vísa málunum til lögreglu."