Tæplega sex hundruð manns hlupu apríl í gabbi sem Vísir og verslunarkeðjan Iceland stóðu fyrir í dag. Í frétt sem birtist á Vísi í morgun var greint frá því að Iceland hefði ákveðið að bjóða viðskiptavinum sínum upp á heimsent sælgæti úr nammibarnum.
Sökum kórónuveirufaraldursins hefur Iceland líkt og fleiri verslanir lokað öllum nammibörum í forvarnarskyni. Var sagt frá því að þó nokkrir viðskiptavinir hefðu lýst yfir vonbrigðum með lokun nammibaranna. Auk þess sæti Iceland uppi með hálft tonn af nammi á lager sem selt yrði á einstökum afslætti. Kíló á þúsundkall sent heim að dyrum.
Klukkan 17 höfðu 590 manns fylgt tengli á heimasíðu Iceland til að ganga frá pöntuninni. Þar biðu skilaboð þess efnis að viðkomandi hefði hlaupið apríl. Í samkomubanni þykir ekki ráðlegt að láta fólk safnast saman svo ákveðið var að hafa aprílgabbið í ár rafrænt.
Nokkrir lesendur Vísis áttuðu sig greinilega á að um gabb væri að ræða en tóku þátt í leiknum. Sögðust nokkrir í athugasemdum hafa gert kjarakaup, keypt nokkur kíló og væru hæstánægðir með viðskiptin.
