Hrókurinn tók Tasiilaq með trompi

Skákfélagið Hrókurinn hélt Polar Pelagic-hátíð á Austur-Grænlandi, sem lauk nú í vikunni.

Sem fyrr var það forseti Hróksins, Hrafn Jökulsson, sem fór fyrir liði sem taldi fimm að þessu sinni og voru þeir viku á Grænlandi; efndu til kennslu, skákmóta og fjöltefla í Kulusuk og Tasiilaq. Og, það var ekki bara skákin sem var á dagskrá:

Teflt við börn í Tasiilaq

„Þá stóð Hrókurinn fyrir útskurðarnámskeiði fyrir börnin í Kulusuk. Gleðin var allsráðandi á Polar Pelagic-hátíðinni, sem markaði upphaf fjórtánda starfsárs Hróksins á Grænlandi,“ segir Hrafn. En að þessu sinni var með í för var listamaðurinn Guðjón Kristinsson frá Dröngum.

Stórmeistarinn Henrik Danielsen, sem komið hefur margoft til Grænlands á vegum Hróksins, kenndi börnunum í Tasiilaq og hafði sér til aðstoðar Jürgen Brandt frá Þýskalandi og Jón Grétar Magnússon, tæknistjóra Hróksins.

„Þeir heimsóttu flestar bekkjardeildir í skólanum í Tasiilaq og á mánudag var efnt til stórmóts þar sem um 100 börn tefldu. Sigurvegari varð Mikael Brandt, Daniel Jörgensen hlaut silfur og Aqqa Larsen brons. Allir þátttakendur á mótinu fengu verðlaun,“ segir Hrafn sem er afar ánægður með hvernig til tókst að þessu sinni.

Gnótt glaðbeittra tuskudýra

Reyndar hefur skáktrúboð Hrafns og Hróksins verið sérlega vel heppnað verkefni sem orðið hefur til þess að byggja margvíslegar brýr milli þessara nágrannaþjóða.

Hrafn, sem gengur undir nafninu Qaardulu á Austur-Grænlandi, kenndi börnunum skák en 47 börn eru nú í skólanum í Kulusuk. Þá tefldi Hrafn fjöltefli við öll börnin og um helgina var haldið BROS-stórmót, þar sem næstum 40 börn og nokkrir fullorðnir, kepptu um glæsilegan bikar.

„Gaman er að segja frá því að stúlkurnar í Kulusuk röðuðu sér í fimm efstu sætin. Sigurvegari var Pipaluk Uitsatikisoq, í 2. sæti varð Qivi Sianale og Aqqa Larsen vann bronsið,“ segir Hrafn.

Listamaðurinn Guðjón Kristinsson vann hug og hjörtu barnanna í Kulusuk á útskurðarnámskeiði, þar sem hann galdraði fram listamanninn í börnunum. Af þessu tilefni var skólanum færð mjög vegleg gjöf með útskurðarhnífum og öðrum búnaði. Hér var um að ræða gjöf frá íslenskri velgjörðarkonu grænlenskra barna.

Hátíðinni lauk með heimsókn í leikskólann í Kulusuk, en þar eru tólf börn. Öll fengu þau gjafir frá Íslandi og leikskólinn fékk gnótt af glaðbeittum tuskudýrum.

Bakhjarlar Hróksins

Hrafn segir aðalbakhjarl hátíðarinnar vera grænlensk-íslenska sjávarútvegsfyrirtækið Polar Pelagic, sem er í eigu Polar Seafood á Grænlandi og Síldarvinnslunnar á Neskaupstað.

„Aðrir bakhjarlar voru Flugfélag Íslands, sem tekið hefur þátt í skáklandnámi Hróksins frá upphafi árið 2003, TOYOTA, Nói Síríus, ÍsSpor, BROS-bolir, ZO-ON, veitingastaðurinn Einar Ben, IKEA, HENSON og fleiri. Þá fóru Hróksmenn klyfjaðir til Grænlands með prjóna- og ullarföt frá prjónahópum Gerðubergs og Rauða krossins í Reykjavík,“ segir Hrafn og er kominn í óstöðvandi plögggír:

„Hrókurinn þakkar öllum sem lögðu lið við undirbúning og framkvæmd skemmtilegrar hátíðar. Nú um páskana liggur leið Hróksmanna í Scoresby-sund, ellefta árið í röð, og í maí verður mikil Flugfélagshátíð í Nuuk, þar sem hinir heimsfrægu stórmeistarar Nigel Short og Jóhann Hjartarson verða heiðursgestir.“