Trump fær daglegar lofskýrslur um sjálfan sig

Aðstoðarmenn Donalds Trump Bandaríkjaforseta færa honum tvær skýrslur á dag þar sem safnað hefur verið saman jákvæðum fréttum og lofi um hann. Tilgangurinn er sagður að létta lund forsetans og eru skýrslurnar sagðar kallaðar „áróðursskjalið“ í Hvíta húsinu.

Í ítarlegri umfjöllun vefmiðilsins Vice News er haft eftir þremur núverandi og fyrrverandi embættismönnum í Hvíta húsinu að Trump fái skýrslurnar tvisvar á dag. Fyrst klukkan hálf tíu að morgni og svo aftur klukkan hálf fimm síðdegis.

Skýrslurnar eru sagðar „fullar af skjáskotum af jákvæðum borðum í kapalsjónvarpsfréttum, aðdáunartístum, afrit af fleðulegum sjónvarpsviðtölum, fréttum fullum af lofi og stundum bara myndum af Trump að líta valdsmannslega út í sjónvarpi“.

Vilja hafa skýrslurnar enn jákvæðari

Reince Priebus, fyrrverandi starfsmannastjóri Hvíta hússins, og Sean Spicer, fyrrverandi blaðafulltrúi Hvíta hússins, eru sagðir hafa keppst um að fá að færa forsetanum skýrslurnar sem geta verið 20-25 blaðsíður sjálfir. Þeir eru jafnframt sagðir hafa átt hugmyndina.

Vice hefur eftir núverandi embættismanni í Hvíta húsinu að einu viðbrögðin sem samskiptasvið Hvíta hússins sem útbýr skýrslurnar hafi fengið við þeim er að „þær þurfi að vera jákvæðari, fjandinn hafi það“. Því kalli sumir starfsmenn skýrslurnar „áróðursskjalið“.

Spicer neitar að lýsing Vice sé rétt en vill ekki segja á hvaða hátt.

Hættulegt forsetanum að einangra sig

Matthew Yglesias, blaðamaður vefmiðilsins Vox og sem var eitt sinn lærlingur hjá demókratanum Chuck Schumer, segir alvanalegt að stjórnmálamenn, hvar í flokki sem þeir standa, láti safna saman umfjöllun fjölmiðla um sig.

Ólíkt Trump geri þeir það þó til þess að fá sem besta mynd af því hvernig sé verið að fjalla um þá, ekki til að heyra samfellda lofræðu um sig. Yglesias segir hættulegt fyrir forsetann að einangra sig fyrir gagnrýni á þennan hátt.

„Þetta vandamál mun að sjálfsögðu aðeins ágerast ef raunverulegar aðstæður breytast til hins verra. Ef enginn vill fara með slæmar fréttir inn á skrifstofu forsetans þá verður engin leið að taka á vandamálum áður en þau fara úr böndunum,“ skrifar Yglesias.