Reynt að endurlífga vopnahléssamkomulag

Árásir Sýrlandshers á borgina Aleppo hafa kostað hundruð manna lífið síðustu tíu daga. Þar á meðal eru tugir barna og kvenna.

John Kerry, utanríkisráðherra Bandaríkjanna, segir sýrlensku stjórnina brjóta gróflega gegn samkomulagi, sem gert var um vopnahlé í borginni. Uppreisnarmenn eru ekki saklausir heldur, segir Kerry.

Bæði hann og Sergei Lavrov, utanríkisráðherra Rússlands, reyna nú að bjarga vopnahléinu út úr því öngþveiti sem ríkt hefur undanfarið, bæði í Aleppo-héraði og víðar í Sýrlandi.

Afar lítið virðist þurfa til þess að vopnahléið renni alveg út í sandinn.

Staffan de Mistura, sérlegur erindreki Sameinuðu þjóðanna gagnvart Sýrlandi, sagði við blaðamenn í Genf, eftir að hann hafði rætt þar við John Kerry, að nú væri reynt að koma á einhverju skipulagi fyrir eftirlit með nýju vopnahléssamkomulagi.

„Við erum að undirbúa slíkt fyrirkomulag, en það þarf pólitískan vilja,“ sagði hann í gær.

Hann sagðist vonast til þess að Sýrlandsstjórn hlusti á Rússa, sem hafa yfirleitt tekið málstað Bashars al Assad forseta.

Í Genf ræddi Kerry einnig við Walid al-Moallem, utanríkisráðherra Sýrlands, og Adel al Jubeir, utanríkisráðherra Sádi-Arabíu.

Samtökin Syrian Observatory for Human Rights, sem hafa aðsetur í Bretlandi og fylgjast grannt með mannréttindabrotum í Sýrlandi, hafa 145 almennir borgarar fallið í loftárásum á svæði sem uppreisnarmenn eru með á sínu valdi.

Meðal annars hafi verið gerð loftárás á sjúkrahús þar í borg á fimmtudaginn, þar sem meira en fimmtíu manns létu lífið, þar á meðal að minnsta kosti einn læknir og fleira heilbrigðisstarfsfólk.

Þá hafi að minnsta kosti hundrað almennir borgarar fallið í árásum á svæði sem stjórnarherinn hefur á sínu valdi. Meðal annars hafi tunnusprengjum og öðrum heimasmíðuðum sprengjum verið varpað á fólk.

Stríðið í Sýrlandi hefur nú staðið í meira en fimm ár og kostað hundruð þúsunda manna lífið. Tölur eru ónákvæmar, en Sameinuðu þjóðirnar telja mannfallið nema um 250 þúsund manns.

Fréttin birtist fyrst í Fréttablaðinu 3. maí