Menning

Bein út­sending: Heima­helgi­stund í Laugar­nes­kirkju

Tinni Sveinsson skrifar
Séra Davíð Þór Jónsson leiðir heimahelgistundina úr Laugarneskirkju í dag. Næstu sunnudaga verða einnig heimahelgistundir í beinni útsendingu úr Lindakirkju í Kópavogi og Vídalínskirkju í Garðabæ.
Séra Davíð Þór Jónsson leiðir heimahelgistundina úr Laugarneskirkju í dag. Næstu sunnudaga verða einnig heimahelgistundir í beinni útsendingu úr Lindakirkju í Kópavogi og Vídalínskirkju í Garðabæ. Vísir/Vilhelm

Í dag klukkan 17 verður heimahelgistund streymt heim til landsmanna frá Laugarneskirkju.

Eins og svo margt annað fellur allt messuhald og fermingar í Þjóðkirkjunni niður í vor vegna samkomubannsins og faraldurs kórónuveiru.

Á meðan á þessu stendur ætlar kirkjan að koma til heimila þess fólks sem getur ekki heimsótt hana og er hægt að fylgjast með í beinni útsendingu hér á Vísi.

„Meðan samkomubann ríkir viljum við færa þjóðkirkjuna og hennar starf heim í stofu. Fólk getur átt þá hugleiðslu, bæn og kyrrð sem það annars myndi eiga í kirkjunni, heima hjá sér. Kirkjan hefur miklar skyldur gagnvart þjóðinni og þetta er ein leiðin til þess að uppfylla þær. Þrjár kirkjur ríða á vaðið, Laugarneskirkja, þá Lindakirkja og svo Vídalínskirkja, framhaldið spilum við svo eftir eyranu eftir því hvernig málin þróast,“ segir Pétur G. Markan, samskiptastjóri Biskupsstofu. Formið á helgistundunum svipar til messu, með hugvekju, bæn og tónlist, en er þó knappara, eða 25 til 30 mínútur.

Sr. Davíð Þór Jónsson leiðir stundina. Elísabet Þórðardóttir leikur á orgel og María Jónsdóttir syngur.

Næsta sunnudag verður heimahelgistund streymt frá Lindakirkju í Kópavogi og svo viku síðar frá Vídalinskirkju í Garðabæ. Einnig verður hægt að horfa á þær hér á Vísi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.