Funda um næstu skref klukkan tíu: Varðskipið Týr sótti þrennt sem varð innlyksa

Sylvía Hall og Berghildur Erla Bernharðsdóttir skrifa 20. desember 2020 09:40

Gríðarlegt tjón hefur orðið eftir aurskriðurnar. Vísir/Egill

Nú klukkan tíu er að hefjast fundur í samhæfingarstöð almannavarna með aðgerðastjórn og Veðurstofunni um hver næstu skref verða á Seyðisfirði þar sem enn er neyðarstig í gangi og Eskifirði þar sem er hættustig.

Viðbragðsaðilar og björgunarfólk var skimað fyrir kórónuveirunni í morgun auk fjölmiðlamanna sem voru fyrir austan, svo smit berist ekki inn í samfélagið

Varðskipið Týr kom til Seyðisfjarðar klukkan ellefu í gærkvöldi eftir sólarhrings siglingu. Skipið verður þar til taks meðan þurfa þykir. Í gærkvöldi sótti áhöfnin þrennt sem varð innlyksa við Hánefsstaði ásamt tveimur köttum og flutti til hafnar á Seyðisfirði.

Fríar þvottavélar og inneignir í verslanir

Margir vilja rétta Seyðfirðingum hjálparhönd en á Facebooksíðunni Seyðisfjörður umræða um málefni samfélagsins.

Eigandi Hótel Múla í Ármúla býður íbúum gistingu ef þeir koma til Reykjavíkur, Ormsson ætlar að gefa öllum þeim sem misstu heimili sín þvottavélar að gjöf, Lindex býður vildakortshöfum sínum tíu þúsund inneign og fimleikadeild Hattar á Egilsstöðum býður börnum fæddum 2005 og yngri í fimleika í dag. Þá eru ýmsir að bjóða fram aðstoð með jólagjafir eða fatnað.

Allir Seyðfirðingar fengu svefnstað eftir aurskriðurnar; fólk fékk rúmpláss á hótelum, gistihúsum og í heimahúsum. Fjöldi fólks hefur boðið Seyðfirðingum húsnæði til að gista í og margir hafa boðist til að lána íbúðir sínar og hús yfir jólin.

Berglind Sveinsdóttir, formaður Múlasýsludeildar Rauða krossins, segir stuðninginn áþreifanlegan.

„Við finnum gríðarlegan stuðning. Þetta er alveg stórkostlegt. Það er einfaldlega ekkert annað orð yfir það.“

Hún segir að fjöldi fyrirtækja og einstaklinga hafi styrkt Rauða krossinn og Seyðfirðinga.

„Við erum að fá sendingar frá fyrirtækjum í Reykjavík og alls staðar að af landinu og verið að bjóða gistingar fyrir sunnan ef einhver vill fara suður og vera þar um jólin. Maður er bara klökkur, það er einfaldlega þannig,“ segir Berglind.

Aurskriður á Seyðisfirði Veður Náttúruhamfarir Múlaþing Landhelgisgæslan

Tengdar fréttir

Landsmenn allir veita Seyðfirðingum stuðning: „Þetta er stórkostlegt og við erum mjög þakklát“

Íbúar á Seyðisfirði hafa ekki fengið að snúa aftur til síns heima í dag. Neyðarstig er enn í gildi og óvíst hvenær hægt verður að hleypa fólki heim til að sækja eigur sínar. Varðstjóri á Seyðisfirði segist hlakka til að árið klárist.

19. desember 2020 19:03

Myndir frá Seyðisfirði sýna gríðarlega eyðileggingu

Eyðileggingin í kjölfar aurskriðanna sem fallið hafa á Seyðisfjörð var áþreifanleg þegar fjölmiðlafólki var hleypt að bænum í dag.

19. desember 2020 16:40

„Ef maðurinn minn hefði hlaupið í hina áttina þá væri hann ekki hér með okkur“

Hildur Þórisdóttir, mannauðsstjóri og fyrrum forseti bæjarstjórnar á Seyðisfirði, segir það vera kraftaverk að ekkert manntjón hafi orðið þegar aurskriðan féll í gær. Bjarki Borgþórsson, lögreglumaður og eiginmaður Hildar, var staddur nærri staðnum sem skriðan féll ásamt öðrum viðbragðsaðilum og mátti litlu muna að verr færi.

19. desember 2020 15:28

Vatnsþrýstingur fer minnkandi í jarðvegi

Vatnsþrýstingur hefur minnkað í jarðvegi á Seyðisfirði og útlit er fyrir að hreinsunarstarf geti hafist. Aðgerðarstjórn og samhæfingarstöðin hafa skipulagt björgunarstarf og gera nú áætlanir um hreinsun.

19. desember 2020 20:44

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.