Erlent

Hvetur ríki heims til að lýsa yfir neyðarástandi

Elín Margrét Böðvarsdóttir skrifar
Antonio Guterres, aðalritari Sameinuðu þjóðanna.
Antonio Guterres, aðalritari Sameinuðu þjóðanna. Getty

António Guterres, aðalritari Sameinuðu þjóðanna, hvatti í dag ríki heims til að lýsa yfir neyðarástandi í loftslagsmálum. Þetta kom fram í opnunarávarpi hans á sérstökum leiðtogafundi Sameinuðu þjóðanna sem fram fór rafrænt í dag í tilefni af fimm ára afmæli Parísarsamkomulagsins í loftslagsmálum.

Guterres gagnrýndi ríkar þjóðir fyrir að verja um 50% meira fjármagni í jarðefnaeldsneyti heldur en í umhverfisvæna orkugjafa í áætlunum sínum um viðspyrnu í kjölfar kórónuveirufaraldursins. Hann sagði að þessu fjármagni sé varið á kostnað komandi kynslóða.

Alls munu ríflega sjötíu leiðtogar hvaðanæva að úr heiminum flytja ávarp á leiðtogafundinum í dag, þeirra á meðal Katrín Jakobsdóttir forsætisráðherra, en Bretland og Frakkland auk Sameinuðu þjóðanna áttu frumkvæði að því að halda fundinn.

Guterres sagði að þegar hafi 38 ríki lýst yfir neyðarástandi í loftslagsmálum og kallaði hann eftir því að fleiri leiðtogar ríkja heims myndu fylgja því fordæmi og gera slíkt hið sama. Neyðarástandi verði fyrst hægt að aflýsa þegar kolefnishlutleysi hafi verið náð.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.