Erlent

Biden segir „vand­ræða­legt“ að Trump hafi ekki viður­kennt ó­sigur enn

Kjartan Kjartansson skrifar
Biden, verðandi forseti, ræddi við fréttamenn í Wilmington í Delaware í dag.
Biden, verðandi forseti, ræddi við fréttamenn í Wilmington í Delaware í dag. AP/Carolyn Kaster

Afneitun Donalds Trump Bandaríkjaforseta á úrslitum forsetakosninganna mun ekki hjálpa arfleið hans og er vandræðaleg, að mati Joe Biden, verðandi forseta. Trump hefur komið í veg fyrir að hefðbundinn undirbúningur fyrir valdaskipti hefjist en Biden segir það ekki gera mikið til.

Þrátt fyrir að Biden hafi verið lýstur sigurvegari forsetakosninganna á laugardag heldur Trump því enn fram að kosningunum sé ekki lokið. Forsetinn heldur uppi rakalausum ásökunum um stórfelld kosningasvik og boðar stórsókn fyrir dómstólum. Sérfræðingar segja að dómsmál séu afar ólíkleg til að hafa áhrif á úrslit kosninganna.

Viðbrögð forsetans þýða að Biden og undirbúningsteymi hans fyrir valdaskiptin hafa enn ekki fengið aðgang að fjármunum og upplýsingum sem venjan hefur verið að fráfarandi stjórn veiti nýkjörnum forseta.

„Mér finnst þetta bara vera vandræðalegt, hreinskilnislega sagt. Hvernig get ég sagt þetta smekklega? Ég held að þetta muni ekki hjálpa arfleið forsetans,“ sagði Biden þegar hann var spurður út í hvaða áhrif hann teldi það hafa á bandarísku þjóðina að Trump þráist við að viðurkenna ósigur.

Tafirnar hægja ekki á undirbúningnum

Þrátt fyrir það sagðist Biden ekki hafa miklar áhyggjur af áhrifum þess að Trump vildi ekki kannast við orðinn hlut. Hann býst ekki við að þurfa að leita til dómstóla til þess að knýja Trump til að viðurkenna hann sem sigurvegara kosninganna.

„Sú staðreynd að þeir eru ekki tilbúnir að viðurkenna að við unnum núna hefur ekki mikla þýðingu fyrir áætlanir okkar og hvað við getum gert fram að 20. janúar,“ sagði Biden en þann dag verður hann settur í embætti forseta.

Undirbúningsteymið þurfi ekki á opinberri fjárveitingu að halda til að halda áfram störfum sínum. Þá gerði Biden lítið úr því að hann fengi ekki upplýsingar frá leyniþjónustu landsins sem verðandi forsetar hafa fengið fram til þessa. Slíkar upplýsingar væru gagnlegar en ekki nauðsynlegar fyrir undirbúning hans að valdaskiptunum.

„Við sjáum ekki að neitt hægi á okkur,“ sagði verðandi forsetinn.

Biden-liðið lagði í dag fram nöfn hundruð manna sem það hefur tilnefnt til að undirbúa valdaskipti innan einstakra ráðuneyta og stofnana alríkisstjórnarinnar. Biden sagði fréttamönnum að hann væri þegar byrjaður að fara yfir mögulega ráðherraefni og hugsanlega forstjóra ríkisstofnana.

Halda áfram eins og ekkert hafi í skorist

Vaxandi fjöldi áhrifamanna í Repúblikanaflokknum hefur tekið undir stoðlausar ásakanir Trump forseta um kosningasvik undanfarna daga. Mike Pompeo, utanríkisráðherra, vakti furðu í dag þegar hann sagði fréttamönnum að valdaskipti til „nýrrar Trump-stjórnar“ ættu eftir að ganga hnökralaust fyrir sig.

Washington Post sagði frá því í kvöld að Hvíta húsið hefði sent alríkisstofnunum þau skilaboð að halda áfram vinnu við fjárlagatillögur Trump forseta þrátt fyrir að slík plögg séu ekki lögð fram fyrr en í febrúar, nokkrum vikum eftir að Biden tekur við embætti forseta.

Mike Pence, varaforseti, er sagður hafa rætt við öldungadeildarþingmenn flokks síns í dag. Hann á meðal annars að hafa sagt þeim að hann trúi því að hann eigi eftir að halda áfram að vinna með þeim sem forseti öldungadeildarinnar. Það er hlutverk varaforseta sem Pence yfirgefur 20. janúar.

Mitch McConnell, leiðtogi repúblikana í öldungadeildinni, sagði í kvöld að engin ástæða væri til að hafa áhyggjur af því að Trump forseti hefði enn ekki viðurkennt ósigur.

„Á einhverjum tímapunkti komumst við að því, að lokum, hver var staðfestur sigurvegari í þessum ríkjum og kjörmannaráðið ákvarðar sigurvegarann,“ sagði McConnell.

Biden var lýstur sigurvegari í ríkjum sem veita honum 290 kjörmenn gegn 214 kjörmönnum forsetans. Talning stendur enn yfir í nokkrum ríkjum og þá verða atkvæði í Georgíu talin aftur vegna þess hversu mjótt var á milli Trump og Biden þar.


Tengdar fréttir

Utanríkisráðherrann vill ekki viðurkenna sigur Biden

Mike Pompeo, utanríkisráðherra Bandaríkjanna, bættist í hóp áhrifamanna innan Repúblikanaflokksins sem neitar að viðurkenna sigur Joe Biden í forsetakosningunum í síðustu viku. Hann sagði fréttamönnum í dag að valdaskipti til „nýrrar Trump-stjórnar“ ættu eftir að ganga hnökralaust fyrir sig.

„Hverju töpum við á því að láta eftir honum?“

Margir af æðstu meðlimum Repúblikanaflokksins hafa lýst yfir stuðningi við viðleitni Donald Trumps til að draga úrslit forsetakosninganna í síðustu viku í efa. Í einrúmi segja þeir þó engan möguleika á því að barátta Trump beri árangur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.