Sem betur fer hættur að drekka þegar hann lenti í storminum með Sigmundi Davíð

Helgi Jean Claessen er nokkuð athyglisverður maður. Hann er á andlega ferðalaginu sem hefur reynst honum vel. Helgi tók líf sitt í gegn fyrir nokkrum árum, hætti að drekka og fór almennt að hugsa betur um sig. Í kjölfarið tók líf hans miklum breytingum og líður honum almennt mun betur fyrir vikið.

Helgi Jean er gestur Einkalífsins í þessari viku en hann heldur úti vinsælu Hlaðvarpi ásamt Hjálmari Erni Jóhannssyni og ber það heitið HæHæ. HæHæ er eitt vinsælasta hlaðvarp landsins.

En líf Helga Jean hefur ekki alltaf verið dans á rósum og komst hann í fjölmiðla í miðju fjárkúgunarmáli forsætisráðherra Íslands fyrir rúmum fimm árum.

Varð að borga 700 þúsund

Þá voru þær Hlín Einarsdóttir og Malín Brand ákærðar fyrir að reyna kúga fé út úr Sigmundi Davíð Gunnlaugssyni, þáverandi forsætisráðherra, í maí árið 2015 og hins vegar fyrir að reyna að kúga fé út úr Helga Jean Claessen, fyrrum ritstjóra menn.is, í apríl sama ár.

Systurnar kröfðu Helga Jean um 700.000 krónur. Ef hann greiddi þeim ekki féð yrði hann kærður til lögreglu fyrir að hafa nauðgað Hlín. Helgi greiddi upphæðina en þegar mál Sigmundar kom upp á yfirborðið hafði hann kjark til þess að leita réttar síns.

„Þetta var bara rosalegur lærdómur og áhugavert að fara inn í þetta mál og finna óttann sem það olli hjá mér,“ segir Helgi Jean og heldur áfram.

„Maður er bara á forsíðum blaðanna og það eru allri að reyna hringja í þig og allir að reyna ná í þig. Það er átak sem fylgir því að gefur manni rosalega auðmýkt gagnvart fréttum. Þetta mál var klárlega sálarkönnun fyrir mig og sem betur fer var ég þarna búinn að vera hættur að drekka í tvö ár, búinn að taka til í lífinu mínu og bara vel áttaður.“

Súrt bragð í munni

Hann segist í rauninni hafa ákveðið eftir umrætt mál að vera alltaf eins góður maður og hann gæti.

„Að lenda inni í svona fréttastormi þar sem maður er sakaður um kynferðisbrot og hafa þurft að gleypa það að vera ógnað þessu og hótað og hafa síðan þurft að beygja sig vera með súrt bragð að hafa borgað fyrir að halda einhverju, það var ótrúlega sárt. Þá var óttinn bara svo mikill. Þegar ég steig síðan fram og stóð með mér í þessu þá varð það alveg andleg reynsla líka. Það var ekki erfiðast að stíga fram, það erfiðast var að vera ásakaður og það er eitthvað sem maður óskar engum að lenda í því að það er alveg ótrúlega erfitt. Þá fann ég hvað fjölskyldan skipti mig miklu máli og ég sóttist bara meira um að vera í kringum fólk. Þá skilur maður hvað rætur eru, maður þarf kannski ekkert á þeim að halda dags daglega en þegar maður lendi í svona uppákomu áttar maður sig á því hvað er að eiga gott bakland.“

Í þættinum hér að ofan ræðir Helgi einnig um samstarfið með Hjálmari Erni og þeirra vináttu, um andlega ferðalagið, um kakóseramóníur, um þær framkvæmdur sem hann hefur verið í á heimili sínu, framtíðina og margt fleira.