Heimsmarkmiðin

Viðbótarframlag frá utanríkisráðuneytinu til kvenna í Jemen

Heimsljós
UNICEF/Huwais

Utanríkisráðuneytið hefur ákveðið að veita Mannfjöldasjóði Sameinuðu þjóðanna (UNFPA) 40 milljóna króna styrk til mannúðaraðstoðar í þágu kvenna og stúlkna í Jemen. Framlagið er viðbót við áður veittan 25 milljóna króna styrk vegna þeirrar miklu neyðar sem konur og stúlkur búa við í þessu stríðshrjáða landi. Samkvæmt gögnum Sameinuðu þjóðanna deyja tólf konur dag hvern vegna skorts á fæðingarþjónustu og mæðravernd.

„Heimsfaraldur kórónuveirunnar og mikill fjárskortur hafa aukið á neyðina og UNFPA hefur þurft að draga úr kyn- og frjósemisþjónustu við konur og stúlkur á þessu ári. Í ljósi þeirra aðstæðna höfum við ákveðið að styðja enn frekar við verkefnið í Jemen,“ segir Guðlaugur Þór Þórðarson utanríkis- og þróunarsamvinnuráðherra.

Engin lausn er í sjónmáli í Jemen eftir fimm ára vopnuð átök. Ríflega 24 milljónir manna þarfnast aðstoðar eða um 80 prósent íbúa landsins. Þjónusta við almenning er í molum, meðal annars heilbrigðis- og neyðarþjónusta fyrir konur og stúlkur. Staða þeirra hefur hríðversnað frá upphafi stríðs og Sameinuðu þjóðirnar telja að konur og stúlkur séu berskjaldaðasti samfélagshópurinn. Þar er meðal annars vísað til mæðradauða og tíðni kynferðislegs og kynbundins ofbeldis.

Ísland hefur stutt verkefni Mannfjöldasjóðs Sameinuðu þjóðanna í Jemen frá upphafi árs 2019 en á vegum sjóðsins er meðal annars veitt fæðingarþjónusta, mæðra- og ungbarnaeftirlit, auk neyðarþjónustu í kjölfar kynferðisofbeldis og sálræns stuðnings og verndar.

Hlutverk UNFPA samræmist þróunarsamvinnustefnu Íslands um tryggja almenna velferð á grundvelli mannréttinda og jafnrétti kynjanna og stofnunin hefur á undanförnum árum aukið þjónustu sína á stríðshrjáðum svæðum. Frá upphafi árs 2019 hefur Ísland veitt 143 milljónum króna til UNFPA í Jemen.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.