Innlent

Svarar þeim kylfingum sem hafa bölsótast út í stjórnendur golfklúbba

Kolbeinn Tumi Daðason skrifar
Agnar Már Jónsson segir formann GKG meðal þeirra sem nú berjist við Covid-19. Örfáir kylfingar tuði en enginn með viti fari gegn tilmælum sóttvarnalæknis.
Agnar Már Jónsson segir formann GKG meðal þeirra sem nú berjist við Covid-19. Örfáir kylfingar tuði en enginn með viti fari gegn tilmælum sóttvarnalæknis.

Agnar Már Jónsson, framkvæmdastjóri GKG, tekur til varna fyrir stjórnendur golfklúbba á höfuðborgarsvæðinu. Hann segir örfáa kylfinga hafa bölsótast út í stjórnendurna á samfélagsmiðlum vegna þess að þeir hafi farið eftir tilmælum sóttvarnalæknis, þess efnis að leggja niður íþróttastarf, með lokun golfvalla. 

Ný reglugerð á grundvelli tilmæla sóttvarnalæknis tekur gildi þriðjudaginn 20. október. Snertilausar íþróttir, eins og golf, verða heimilar.

Tilmæli og reglugerð fóru ekki saman

Rifja má upp að þann 8. október lagði sóttvarnalæknir til við heilbrigðisráðherra að vegna uppgangs kórónuveirufaraldursins á höfuðborgarsvæðinu yrði allt íþróttastarf á höfuðborgarsvæðinu lagt niður til 19. október. 

Í reglugerð ráðherra fór hann að flestum tilmælum sóttvarnalæknis en þó ekki þeim er vöruðu íþróttastarf. Lagði ráðherra ekki bann við íþróttaiðkun utandyra heldur aðeins innandyra.

Ákvörðunin sætti nokkurri gagnrýni, bæði á meðal þeirra sem töldu knattspyrnu fá aukið svigrúm á kostnað til dæmis handbolta og körfubolta. Þingmenn tókust á um málið.

Sóttvarnalæknir ítrekaði svo tilmæli sín um að leggja af allt íþróttastarf á höfuðborgarsvæðinu og fór svo að viðbragðshópur Golfsambands Íslands ákvað, eftir samtal og samráð við fulltrúa Íþrótta- og Ólympíusambands Íslands og almannavarnadeild ríkislögreglustjóra, að fara að tilmælum sóttvarnalæknis.

Golfvöllum á höfuðborgarsvæðinu var því lokað. Þeir voru þó enn opnir á landsbyggðinni og lögðu einhverjir kylfingar land undir fót, í trássi við önnur tilmæli sóttvarnalæknis þess efnis að fólk á höfuðborgarsvæðinu færi ekki út á land að óþörfu, og spiluðu golf.

Þá minnti Golfsambandið á þessi tilmæli og minnti kylfinga á að leita ekki á golfvelli utan höfuðborgarsvæðisins.

Akurnesingar fengu 26 kylfinga í heimsókn og þingmaður úr Hafnarfirði spilaði golf í Hveragerði.

„Við erum að eiga við miklu alvarlegri hlut en það hvort að fólk geti spilað golf eða ekki. Í grunninn held ég að flestir hafi skilning á því,“ sagði Brynjar Eldon Geirsson, framkvæmdastjóri Golfsambands Íslands.

Á sama tíma sagðist Haukur Örn Birgisson, formaður GSÍ, skilja gremju kylfinga á höfuðborgarsvæðinu að komast ekki í golf.

Enn virðist bera á óánægjuröddum sem verður til þess að Agnar Már stingur niður penna.

„Örfáir kylfingar hafa bölsótast út í okkur stjórnendur golfklúbbanna á samfélagsmiðlum vegna þess að við fórum eftir tilmælum sóttvarnalæknis um lokun golfvalla,“ segir Agnar Már.

„Fólk veikist í kringum okkur“

„Heimurinn glímir nú við vandamál af óþekktri stærðargráðu, yfir milljón manns hafa látist, ellefu hér á Íslandi. Veiran getur lagst með gríðarlegum þunga á fólk og margir hverjir hafa ekki náð sér og glíma við alvarleg eftirköst. Fólk er að veikjast í kringum okkur og meðal annars hefur formaður GKG legið þungt haldinn á sjúkrahúsi undanfarna daga.“

Ljóst er að skoðun Agnars Más er afar skýr.

„Undir svona kringumstæðum er ekkert sem fær stjórnenda með lágmarksvitglóru til að fara gegn tilmælum sóttvarnalæknis ... alveg sama hvað honum eða öðrum finnast þau fáránleg.“

Örfáir kylfingar hafa bölsótast út í okkur stjórnendur golfklúbbanna á samfélagsmiðlum vegna þess að við fórum eftir...

Posted by Agnar Már Jónsson on Saturday, October 17, 2020

Ný reglugerð ráðherra tekur gildi á þriðjudag. Þar er farið í einu og öllu eftir tilmælum sóttvarnalæknis sem leggur til að snertilausar íþróttir verði heimilaðar á höfuðborgarsvæðinu. Golf er snertilaus íþrótt.

„Íþróttaiðkun sem ekki krefst snertingar verður heimil en fjöldi þátttakenda má að hámarki vera 20 einstaklingar og 2 metra nándarmörk skulu virt,“ segir um íþróttastarf á höfuðborgarsvæðinu.

Áformaðar breytingar á sóttvarnaráðstöfunum 20. október

Fróðlegt verður að sjá hvernig golfklúbbarnir bregðast við á þriðjudaginn. Þó er farið að síga verulega á seinni hlutann á golftímabilinu á landinu og margir klúbbar eflaust farnir að huga að völlum sínum fyrir veturinn.


Tengdar fréttir

Áhyggjuefni að fólk skilji ekki sóttvarnatilmæli

Tilmæli um að golfvellir loki samhliða því sem annað íþróttastarf leggst tímabundið af eru liður í því að reyna að koma í veg fyrir hópamyndun. Þórólfur Guðnason, sóttvarnalæknir, segir það áhyggjuefni ef fólk skilur ekki hvers vegna gripið sé til sóttvarnaaðgerða.

26 kylfingar frá höfuð­borgar­svæðinu spiluðu á Akra­nesi í gær

26 kylfingar frá höfuðborgarsvæðinu fóru í gær á Akranes til þess að spila golf. Bæjarstjóri Akraness segir miður að íbúar höfuðborgarsvæðisins hafi ekki farið eftir tilmælum sóttvarnayfirvalda að fara ekki út fyrir höfuðborgarsvæðið nema brýna nauðsyn beri til.

Forseti GSÍ skilur reiði kylfinga

Haukur Örn Birgisson, forseti GSÍ, segir að það hafi verið erfitt að hunsa tilmæli sóttvarnayfirvalda um að loka golfvöllum á höfuðborgarsvæðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.