Innlent

Mars sem stærstur og bjartastur á himninum

Kjartan Kjartansson skrifar
Reikistjarnan Mars rauðleit og björt við hlið norðurljósa yfir Hótel Rangá 23. september 2020.
Reikistjarnan Mars rauðleit og björt við hlið norðurljósa yfir Hótel Rangá 23. september 2020. Sævar Helgi Bragason

Reikistjarnan Mars vekur athygli margra þessa dagana en hún er nú sem stærst og björtust á himninum vegna staðsetningar hennar gagnvart jörðinni í sólkerfinu. Hægt er að berja reikistjörnuna augum allar myrkurstundir þessar vikurnar.

Mars er sérstaklega bjartur á himninum þessa dagana vegna þess að jörðin er mitt á milli hans og sólarinnar. Slík staða nefnist gagnstaða við jörðu og í tilfelli Mars á hún sér stað á um það bil tveggja ára fresti. Aðeins um 62 milljónir kílómetrar skilja nú reikistjörnurnar tvær að en fjarlægðin á milli þeirra verður mest um 400 milljónir kílómetra. 

Í grein á Vísindavefnum kemur fram að Mars er að finna í austri skömmu eftir sólarlag, í suðri um miðnætti og í vestri á morgunhimninum fyrir sólarupprás.

Fjarlægðin á milli Mars og jarðarinnar hefur farið vaxandi eftir 6. október þegar hnettirnir tveir voru sem næstir hvor öðrum. Halda þeir áfram að fjarlægjast hægt og bítandi. Rauða reikistjarnan verður þó áfram sjáanleg á himninum þar til hún hverfur í sumarbirtuna í maí.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×