Amazon kaupir 100.000 raf-sendibíla frá Rivian

Kristinn Ásgeir Gylfason skrifar 12. október 2020 07:01

Raf-sendibíllinn sem Amazon ætlar að setja á göturnar á næstu árum.

Amazon segir að fyrstu bílarnir verði komnir í umferð á næsta ári. Netrisinn segist vera að „hækka viðmiðið fyrir næstu kynslóð sendibíla“.

Amazon hefur pantað 100.000 sendibíla frá Rivian, rafbílaframleiðandanum í Kaliforníu. Bílarnir 100.000 eiga að afhendast frá og með næsta ári og til ársins 2030. Markmiðið er að fyrstu 10.000 verði komnir í gagnið fyrir árslok 2022.

Sendibifreiðin er ein þriggja tegunda sem Amazon hefur fjárfest í. „Við vitum að bíllinn þarf að vera miklu betri en allir aðrir sendibílar. Við viljum að bílstjórarnir okkar elski að nota þá,“ sagði Ross Rachey, alþjóðlegur flotastjóri Amazon.

Innra rými í Rivian sendibílnum, greinilega alveg hannaður fyrir Amazon.

Sendibíllinn verður útbúinn allskonar ökumannsaðstoð, þar á meðal 360 gráðu myndavél og skynjurum allan hringinn. Þar að auki verður urmull af tækni til að auðvelda ökumönnum akstur á hraðbrautum of í umferð.

Rachey segir að Amazon sé að vinna í tæknilausnum eins og neti hleðslustöðva og öðrum innviðum til að styðja við notkun rafbílanna.

Rivian sendibílarnir verða líklegast einungis notaðir í Bandaríkjunum til að byrja með, en Amazon hefur einnig keypt 1800 raf-sendibíla fyrir evrópska flotann sinn í ár og hefur þegar byrjað að nota rafhjól í sendingum sínum í sumum evrópskum borgum.

Þá hefur Amazon samið um kaup á 10.000 rafbílum til notkunar í indverska flota sínum fyrir árið 2025.

Amazon hefur fjárfest í Rivian fyrir um 350 milljón sterlingspund, um 63 milljarða íslenskra króna.

Vistvænir bílar Amazon

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.