Aldrei fleiri greinst með veiruna á heimsvísu en í gær

Alþjóðaheilbrigðisstofnunin greinir frá því að aldrei hafi jafnmargir greinst smitaðir á einum degi af kórónuveirunni á heimsvísu en í gær.

Staðfestum smitum fjölgaði um tæp 340 þúsund og þar á uppsveifla faraldursins í Evrópu mikinn þátt.

Í Evrópu voru tæplega 97 þúsund smit staðfest og hefur sú tala aldrei verið hærri.

Dauðsföll af völdum veirunnar voru 5500 og alls hafa ein milljón og fimm þúsund manns nú látið lífið í faraldrinum.

Ef öll Evrópa er talin saman eru nú að mælast fleiri staðfest tillfelli heldur en í ríkjum á borð við Bandaríkin, Indland og Brasilíu.

Samkvæmt Reuters fréttastofunni er nú uppsveifla í faraldrinum í fimmtíu og fjórum löndum, þar á meðal í Argentínu, Kanada og í flestum Evrópuríkjum.