Innlent

Icelandair kallar eftir fyrirsjánleika vegna næsta árs

Heimir Már Pétursson skrifar
Bogi Nils Bogason segir erfitt fyrir ferðaþjónustuna að hefja alvöru sölu á ferðum til landsins á næsta ári þegar enginn fyrirsjáanleiki sé til staðar varðandi fyrirkomulag við landamærin. Það myndi bæta stöðuna að hafa samræmdar reglur á flugvöllum í Evrópu.
Bogi Nils Bogason segir erfitt fyrir ferðaþjónustuna að hefja alvöru sölu á ferðum til landsins á næsta ári þegar enginn fyrirsjáanleiki sé til staðar varðandi fyrirkomulag við landamærin. Það myndi bæta stöðuna að hafa samræmdar reglur á flugvöllum í Evrópu. Vísir/Vilhelm

Forstjóri Icelandair segir mikilvægt að fljótlega verði til einhver fyrirsjáanleiki varðandi tilhögun sóttvarna við landamærin svo ferðaþjónustan hafi möguleika á að selja þjónustu hér á næsta ári. Forsætisráðherra segir ástand kórónufaraldurins í öðrum löndum hafa mikil áhrif á stöðuna.

Frá því tekin var upp tvöföld skimun með fimm daga sóttkví á milli fyrir alla sem koma til landsins frá og með 19. ágúst hafa ferðamenn nánast hætt að koma til landsins. Icelandair birti flutningstölur sínar fyrir september í gær. Tólf þúsund manns flugu með félaginu milli landa í mánuðinum sem er 97 prósenta samdráttur frá september í fyrra og tæplega þúsund farþegum færri en flugu með Air Iceland Connect innanlands í sama mánuði.

Bogi Nils Bogason segir megin ástæðu 97 prósenta fækkunar farega Icelandair í september vera fyrirkomulag skimunar við landamærin.Vísir/Vilhelm

Bogi Nils Bogason forstjóri Icelandair segir félagið hafa undirbúið sig allt frá því í vor fyrir að komandi vetur gæti orðið félaginu mjög erfiður. Félagið væri tilbúið að komast í gegnum þessa stöðu fram á næsta vor og jafnvel lengur eftir vel heppnað útboð og endurskipulagningu.

„En auðvitað væri betra að þetta færi að fara í gang fyrr en síðar. Landamæri hér myndu opna í takt við það sem við erum að sjáum í öðrum löndum. Það sem er nauðsynlegt fyrir okkur og ferðaþjónustuna í heild sinni er að það sé einhver fyrirsjáanleiki. Hvernig þetta muni þróast inn á næsta ár því það er mjög erfitt að selja landið sem ferðamannaland ef við vitum ekki hvernig ferðatakmarkanir og skimunarreglur verða á næsta ári,“ segir Bogi Nils.

Síðast liðnar tvær vikur hafa aðeins verið 145 komur og brottfarir samanlagt á Keflavíkurflugvelli eins og sést í meðfylgjandi töflu.Grafík/HÞ

Mikilvægt væri að fá einhvern fyrirsjáanleika í náinni framtíð. En Evrópusambandið hefur lagt til samræmdar reglur ríkja innan Evrópska efnahagssvæðisins þar sem litakóðar yrðu notaðir fyrir einstök lönd og svæði.

Katrín Jakobsdóttir forsætisráðherra segir margar leiðir hafa verið skoðaðar hér á landi, meðal annars að farþegar fari í skimun í heimalandinu nokkrum dögum fyriir komuna hingað með vottorð upp á fyrri skimun. Allir þessir möguleikar séu áfram til skoðunar hjá stjórnvöldum.

„Það er auðvitað ekki bara við sóttvarnaráðstafanir að sakast. Við erum að sjá algert hrun bæði í flugumferð og ferðaþjónustu um heim allan vegna heimsfaraldurs. Þannig að þetta snýst auðvitað ekki bara um þær ráðstafanir sem við setjum okkur hér heldur stöðuna alþjóðlega. Hún er svört um um heim allan. Sömuleiðis auðvitað eins og staðan er hér innanlands núna þá erum við Íslendingar komnir á rauðan lista hjá all mörgum þjóðum sem auðvitað gerir ferðalög hingað sérstaklega fýsileg einmitt um þessar mundir,“ segir Katrín Jakobsdóttir.


Tengdar fréttir

Isavia tapaði 7,6 milljörðum á hálfu ári

„Áhrif kórónuveirunnar á rekstur flugvalla og flugleiðsöguþjónustu hafa verið veruleg og ber afkoman hjá samstæðu Isavia þess merki,“ segir Sveinbjörn Indriðason, forstjóri Isavia.

Upprisa ferðaþjónustunnar lykillinn að efnahagsbata

Megin vextir Seðlabankans verða áfram eitt prósent samkvæmt tilkynningu peningamálastefnunefndar bankans í morgun. Seðlabankastjóri segir lægri vexti hafa skilað sér vel til heimilanna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.