Lífið

Smábörn viti betur en virkir í athugasemdum

Ása Ninna Pétursdóttir skrifar
Bergrún Íris Sævarsdóttir barnabókahöfundur vakti athygli fyrir dagbókafærslu sem hún birti á Facebook síðu sinni en dagbókarfærslan er frá því að Bergrún var tvítug. 
Bergrún Íris Sævarsdóttir barnabókahöfundur vakti athygli fyrir dagbókafærslu sem hún birti á Facebook síðu sinni en dagbókarfærslan er frá því að Bergrún var tvítug.  Mynd/Ólafur Már Svavarsson

„Hér er um að ræða fullorðið fólk sem skrifar virkilega ljótar athugasemdir í athugasemdakerfi fjölmiðlanna. Sumir segja að þetta fólk hagi sér eins og smábörn, en það er bara ekki rétt. Smábörn vita betur en að meiða aðra,“ segir Bergrún Íris Sævarsdóttir barnabókahöfundur í samtali við Vísi.

Með þessu vísar Bergrún til umtalsins sem skapast hefur í samfélaginu um stúlkurnar tvær sem heimsóttu landsliðsmenn enska landsliðsins á hótelherbergi um síðustu helgi.

„Þeir sem hafa hæst á Internetinu og dæma hvað harðast eiga eflaust sjálfir hressandi sögur frá þessum aldri sem þeir hafa kannski gleymt. Sem er algjör synd, þetta eru oft skemmtilegustu minningarnar,“ segir Bergrún og hlær.

„Veistu, ég er bara orðin svo þreytt á því að stelpur séu kallaðar hórur fyrir það eitt að vera sætar og skemmta sér,“ segir Bergrún og heldur áfram. „Fólk mætti alveg líta sér nær. Enginn er fullkominn og við ættum að varast að kasta steinum úr viðkvæmum glerhúsum. Fjöldi fólks hefur gert mistök síðustu mánuði og við erum öll að reyna að fóta okkur í þessum nýja og sótthreinsaða veruleika.“

Bergrún segist vera þreytt á því að stelpur séu kallaðar hórur fyrir það eitt að vera sætar og skemmta sér og segist hún undrandi á því hversu samfélagið dæmi atvik sem þessi harkalega. Aðsend mynd

Bergrún segist undrandi á því hvernig fólk leyfir sér að tala á netinu og lýsir áhyggjum sínum af því hversu hart samfélagið dæmir einstaklinga fyrir atvik sem þessi. 

„Ég set spurningarmerki við tilhneigingu fólks og fjölmiðla til að einblína á smáatriði sem þennan atburð þegar alvarlegri hlutir eiga sér stað um allan heim. Ef við slökum á slúðrinu, sjáum við kannski skýrar hvað valdamikið fólk og fyrirtæki er að gera jörðinni og lífríki hennar.“

Á sama tíma og við veltum okkur upp úr helgarfjöri á Hótel Sögu, gerast grafalvarlegir hlutir í heiminum sem við þyrftum frekar að veita athygli. Þess utan, gætum við séð inn í kollinn á 19 og 20 ára stelpum, þá er líklegt að þær dæmi sig nógu hart sjálfar. Þær þurfa ekki hjálp ókunnugra við það.

Að elska mistökin sín og læra af þeim

„Ég segi börnunum mínum alltaf að elska mistökin sín því maður lærir heilmikið af þeim. Það er svo mikilvægt að sýna sjálfum sér mildi, þykja vænt um mistökin sín og alla lífsreynslu og sjá það jákvæða við erfiðar og flóknar aðstæður. Þessar ungu konur fá þann lærdóm fullharkalega í fangið en mér sýnist þær nógu sterkar og töff til að takast á við það. Ef ég stæði sjálf í þeirra sporum væri ég flúin úr bænum og búin að slökkva á Internetinu. Ég dáist að því hvað þær standa teinréttar undir þessari ósanngjörnu gagnrýni.“

Í gær birti Bergrún mynd á Facebook af fjórtán ára gamalli dagbókarfærslu sem hún skrifaði þegar hún var tvítug þar sem hún telur upp tíu atriði sem hún kallaði þá, Boðorðin tíu. Listinn er upptalning á hlutum sem henni fannst hún þurfa að breyta varðandi útlit sitt, eins og hvítari tennur, betri húð og sléttari magi.

„Ég var að taka til á vinnustofunni minni fyrir rúmri viku og rakst á þessa dagbók. Ég fékk tár í augun þegar ég sá hvað ég dæmdi mig hart. Mig langaði bara að knúsa þessa tvítugu stelpu.“

Undir myndina endurskrifar svo Bergrún ný Boðorð til sín sem tvítugrar stelpu. 

  1. Njóttu þess að sofa!
  2. Mamma þín hefur rétt fyrir sér varðandi flesta hluti.
  3. Faðmaðu afa og hlustaðu af athygli á sögurnar hans.
  4. Farðu oftar með ömmu í Smáralind.
  5. SLAKAÐU Á og lifðu hægar. Það liggur ekkert á.
  6. Fólk er miklu uppteknara af sjálfu sér en þér!
  7. Þú ert ekki áhyggjurnar þínar, leyfðu þeim að koma og fara.
  8. Þín bíða ótrúleg ævintýri og frábær tækifæri, treystu því.
  9. Elskaðu líkamann þinn. Hann á eftir færa þér tvo dásamlega drengi.
  10. Hentu vigtinni og bakaðu köku.

Fjöldi fólks hefur skrifað athugasemd við færslu Bergrúnar en ein af þeim er rithöfundurinn Silja Aðalsteinsdóttir.

„Eins og upp úr minni dagbók annó 1963.“

„Þetta er greinilega ekkert nýtt, þetta sjálfsniðurrif ungra kvenna. Þetta er bara meira upp á yfirborðinu núna. Konur hafa greinilega lengi reynt að taka sem minnst pláss,“ segir Bergrún.  

Bergrún segir samfélagsmiðla senda fólki óljós skilaboð og gera harðar kröfur og því ekki skrítið að margir finni fyrir óöryggi með útlit sitt og tilvist.

Þetta er veruleiki margra ungra kvenna. Samfélagið segir þér að tálga þig til og líta út á ákveðinn hátt en um leið og þú uppfyllir þær kröfur ertu kölluð athyglissjúk hóra og öðrum hræðilegum nöfnum.

Handskrifuð orð í stað vanhugsaðra skoðana á lyklaborðið

Bergrún segist hvetja fólk til að skrifa niður skoðanir sínar á blað eða segja þær upphátt áður en þær fái að fara á netið.

„Ég held að margir myndu hætta við neikvæðar athugasemdir ef þeir myndu fyrst skrifa orðin með blýanti á blað. Það er eins og það verði til einhver siðblinda hjá fólki þegar það hamrar á lyklaborðið. Oft er þetta bara tilgangslaust öskur út í vindinn. Við þurfum að vanda okkur og hugsa okkur vel um áður en við setjum athugasemdir út á Internetið. 

Um leið og þú ýtir á enter er þín skoðun orðin að útgefinni yfirlýsingu sem erfitt er að taka til baka. Ef fólki finnst sín skoðun endilega eiga heima á netinu þá vil ég hvetja það til að taka sér góðan tíma, skoða athugasemdina og spyrja sig þriggja spurninga: er þetta satt, er þetta sagt í góðvild og er þetta nauðsynlegt?





Fleiri fréttir

Sjá meira


×