Atvinnulíf

Skattfrádráttur dæmi um þróunarstyrk sem fleiri gætu nýtt sér

Rakel Sveinsdóttir skrifar
Svandís Unnur Sigurðardóttir starfar sem sérfræðingur hjá Rannís. Hún bendir á nokkra nýsköpunarsjóði sem fyrirtæki geta sóst í fyrir sín nýsöpunar- og þróunarverkefni. Það á við um rótgróin fyrirtæki sem yngri fyrirtæki.
Svandís Unnur Sigurðardóttir starfar sem sérfræðingur hjá Rannís. Hún bendir á nokkra nýsköpunarsjóði sem fyrirtæki geta sóst í fyrir sín nýsöpunar- og þróunarverkefni. Það á við um rótgróin fyrirtæki sem yngri fyrirtæki. Vísir/Vilhelm

Það eru ekki einungis ung fyrirtæki eða ,,start up“ fyrirtæki sem geta sótt um styrk fyrir þróunar- og nýsköpunarverkefni. Rótgróin fyrirtæki geta gert það einnig segir Svandís Unnur Sigurðardóttir sérfræðingur hjá Rannís. Sérstaklega er bent á skattfrádrátt en þar geta fyrirtæki fengið allt að 20% af útlögðum kostnaði niðurgreidda vegna þróunarverkefna sem þau sinna.

Í umræðu um mikilvægi nýsköpunar í atvinnulífinu er vert að benda fyrirtækjum á að öll fyrirtæki geta sótt um styrki fyrir sérstök nýsköpunar- eða þróunarverkefni sem þau sinna innanhús hjá sér. Fjölmörg dæmi eru um að fyrirtæki sem hafa verið í rekstri í dágóðan tíma, nýti sér þetta. Má þar nefna Kerecis, Nox Medical og Orf Líftækni. Styrkir eru veittir miðað við mismunandi skilyrði og forsendur.

En hvaða sjóðir eru það þá helst sem fyrirtæki geta almennt sóst í?

,,Það eru þessir fyrirtækjastyrkir, Vöxtur og Markaðsstyrkur, einnig eru í boði styrkir fyrir einkaleyfi og Evrópusamstörf eins og ERA-net og Eurostars,“ segir Svandís Unnur og bætir við ,,Svo er Skattfrádráttur rannsókna- og þróunarverkefna, sem er réttindasjóður.“

Í handbók um skattfrádrátt segir:

,,Fyrirtæki sem er eigandi að rannsóknar- eða þróunarverkefni á rétt á frádrætti frá álögðum tekjuskatti sem nemur allt að 20% af útlögðum kostnaði vegna þessara verkefna. Hámark kostnaðar til útreiknings hjá hverju fyrirtæki er 600.000.000 kr á rekstrarári ef verkefnið er ekki samstarfsverkefni og ef fyrirtækið er ekki með aðkeypta rannsóknar- eða þróunarvinnu í verkefninu.“

Einnig: Nýsköpun ekki lúxus heldur lífsnauðsynleg

Að sögn Svandísar Unnar eru endurskoðendur sérstaklega hvattir til að benda fyrirtækjum á skattfrádráttinn. Þá segir hún Rannís einnig standa fyrir opnum kynningarfundum reglulega til að vekja athygli á styrkjum sem eru í boði.

Getur þú nefnt dæmi um styrkveitingar síðustu árin til fyrirtækja sem hafa verið lengi í rekstri en nýtt styrki til að létta undir kostnaði nýsköpunarverkefna?

„Nokkur dæmi um slík fyrirtæki eru CRI hf, ORF Líftækni hf., Nox Medical ehf., DT Equipment ehf., Thor Ice Chilling Solutions ehf., KERECIS hf. og CURIO ehf. en þau hafa öll starfað lengi í rekstri og fengið styrki vegna nýsköpunarverkefna sem þau sinna innanhúss.“

Að fá styrk getur verið hvetjandi fyrir fyrirtæki að ráðast í nýsköpunarverkefni. Sem dæmi má nefna er Markaðsstyrkur ætlaður litlum og meðalstórum fyrirtækjum sem huga á sókn á nýjum mörkuðum eða vinna að þróunarverkefni sem kallar á frekari uppbyggingu innviða.

Á vefsíðu Nýsköpunarmiðstöðvar Íslands má einnig sjá yfirlit yfir stærri og smærri styrki.


Tengdar fréttir

Leið til að hætta ekki við góðar hugmyndir

Langar þig að stofna þinn eiginn rekstur? Eða ertu með einhverja góða hugmynd fyrir vinnuna, sem þú þorir ekki að velta í framkvæmd? Hér rýnum við í það hvað getur verið að aftra fólki frá því að fylgja hugmyndum eftir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.