Uppgjör Henrys: Draumabyrjun en martraðarendir

Strákarnir okkar hafa lokið keppni á EM. Þeir töpuðu lokaleik sínum í kvöld, 32-25, gegn Svíum. Það vantaði allt malt í okkar menn sem sáu aldrei til sólar í leiknum. Þeir enda því mótið í ellefta sæti.

Menn virtust lítið hafa lært af Noregsleiknum því strákarnir byruðu þennan leik næstum því jafn illa. Munurinn í hálfleik var síðan 18-11 en í Noregsleiknum var hún 19-12.

Bensínlausir

Það var aldrei nein endurkomu í kortunum að þessu sinni. Það verður ekki sagt að menn hafi ekki reynt. Það var gjörsamlega allt reynt en þetta var einn af þessum leikjum sem ekkert gengur upp.

Þess utan voru strákarnir orkulausir og óvenju mistækir. Vinstra hornið og Kári Kristján skiluðu sínu. Aðrir gátu ekki neitt. Því miður.

Eftir frábæra byrjun á mótinu þá var endirinn ansi snubbóttur. Eins og svo oft áður. Það verður að segjast að ólíkt öðrum toppþjóðum virðist íslenska liðið ekki hafa líkamlega burði til þess að standa í þeim bestu er líður á mótin. Það er áhyggjuefni.

Skref í rétta átt



Það má taka margt gott úr þessu móti og þetta mót var klárlega skref fram á við. Það yljaði að sjá 18 og 19 ára stráka í byrjunarliðinu í dag. Það er nægur efniviður.

Við eignuðumst flotta landsliðsskyttu í Viggó á EM. Undrabörnin Haukur Þrastar og Viktor Gísli fengu mikla eldskírn og Janus Daði skilaði heilt yfir frábæru móti. Vörnin gaf eftir en þegar hún var upp á sitt besta var hún frábær. Ernirnir Elvar og Ýmir slógu í gegn. Sigvaldi gerði það líka í hægra horninu. Það var svo sannarlega margt jákvætt.

Íslenska liðið komst lengra á þessu móti en síðustu sex ár. Alexander átti æðislega endurkomu og átti stóran þátt í því að liðið fór áfram. Hann klárar vonandi umspilsleikina fyrir HM í sumar og hjálpar liðinu að komast á HM. Þessi magnaði stríðsmaður á skilið að ríða brosandi inn í sólarlagið.

Ofurmennið Guðjón Valur kláraði stórmót númer 22 og var frábær. Aron Pálmarsson náði því miður ekki að tengja saman heilt mót nægilega vel eftir lygilega byrjun.

Þjálfarateymið stóð sig síðan stórkostlega og mætti liðið oftar en ekki frábærlega undirbúið. Þeir eru á réttri leið og liðið er það líka. Ég hlakka til að sjá hvað þetta lið gerir á næstu árum.