Framkvæmdastjóri Capacent furðar sig á útskýringum Ara Trausta

Halldór Þorkelsson framkvæmdastjóri Capacent segir að sér komi afstaða meirihluta Þingvallanefndar vegna Ólínu-málsins svokallaðs mjög á óvart.

Ólínu Þorvarðardóttur voru dæmdar bætur sem nemur 20 milljónum í kjölfar þess að jafnréttisnefnd taldi á henni brotið þegar gengið var fram hjá henni við ráðningu þjóðgarðsvarðar á Þingvöllum, en hún sótti um starfið.

Allt Capacent að kenna

Páll Magnússon þingmaður situr í nefndinni og hann sagði í samtali við Vísi, að hann teldi hugsanlegt að ríkissjóður ætti kröfu á hendur Capacent, sem annaðist umsóknarferlið. Páll sagði að láðst hafi að færa til bókar hið huglæga mat meirihluta nefndarinnar sem lá til grundvallar þegar hún ákvað að ráða heldur Einar  Á. E. Sæmundsen til að gegna stöðunni. Og það skrifist á Capacent.

Ari Trausti Guðmundsson, formaður nefndarinnar, tók í sama streng og sagði að hann væri algerlega blautur á bak við eyrun í því sem snýr að opinberum ráðningum; hann hafi alveg treyst á Capacent í þessum efnum.

Halldór undrast það mjög að Ari Trausti vilji með þessum hætti skella skuldinni á Capacent. Aðkoma fyrirtækisins að ráðningum og ráðningarferli sé alveg skýrt. Hún sé ráðgefandi en það sé viðskiptavina að taka ákvörðun.

„Við teljum að það sé skýrt hvað felst í aðkomu okkar hverju sinni.“

Þannig að þessar útskýringar Ara Trausta koma þér þá í opna skjöldu?

„Já, þær gerðu það, mjög svo, verulega,“ segir Halldór og útskýrir að hann og þau hjá Capacent séu sannfærð um ágæti aðkomu fyrirtækisins.

Að biðjast aldrei afsökunar

Afstaða og útskýringar Þingvallanefndar hefur verið til umfjöllunar á samfélagsmiðlum og sitt sýnist hverjum um þær. Þannig hefur Eiríkur Rögnvaldsson prófessor emeritus, sem hefur langa reynslu af starfi innan hins opinbera, talið málið til marks um þá almennu viðleitni sem ríkir meðal kjörinna fulltrúa, að vilja varpa frá sér ábyrgð. Almennt sé þeim fyrirmunað að játa á sig mistök eða skipta um skoðun.

„Að biðjast aldrei afsökunar er í raun og veru bara ein birtingarmynd miklu djúprættara og alvarlegra vandamáls í íslenskri stjórmála- og samskiptamenningu: Að viðurkenna aldrei mistök. Alveg sama þótt allir viti að maður hefur gert mistök, og alveg sama þótt maður viti að allir viti að maður gerði mistök - maður viðurkennir það ekki. Það væri veikleikamerki. Maður sem viðurkennir mistök er búinn að vera - virðast margir halda,“ segir Eiríkur.

Eiríkur segir jafnframt að ef menn geri aldrei mistök, þá þurfi auðvitað aldrei að biðjast afsökunar. Af sjálfu leiði.

„Í stað þess að viðurkenna mistök kennir maður öðrum um. Formaður Þingvallanefndar kennir ráðningarstofu um og varaformaðurinn vill gera minnihlutann samábyrgan. Formaðurinn vísar líka til eigin reynsluleysis í ráðningarmálum, eins og það sé einhver afsökun - hann er formaður stjórnsýslunefndar sem hefur tiltekið hlutverk og á að setja sig inn í málin.“

Pistill Eiríks hefur vakið mikla athygli og hafa ýmsir orðið til að dreifa honum áfram um samfélagsmiðilinn.

Starfsmönnum Capacent sárnar að vera kennt um

„Við höfum komið að svona verkefnum í áratugi,“ segir Halldór. „Hér er fólk sem hefur langan starfsaldur og mikla reynslu af ferlum sem þessum.

Þetta kemur vissulega á óvart og fólk hér tekur svona nærri sér.“ Halldór bendir jafnframt á að Capacent hafi um áratugaskeið veitt ráðgjöf í tengslum við opinberar ráðningar.

„Það samstarf, við hina ýmsu fulltrúa hins opinbera, hefur verið afskaplega farsælt. Ávallt er farið yfir það með viðskiptavinum í tengslum við opinberar ráðningar hvað í þjónustu fyrirtækisins felst áður en ráðgjöf er veitt. Capacent veitir ekki lagalega ráðgjöf í tengslum við ráðningar. Þá er það ávallt á valdsviði opinberra aðila að taka ákvörðun á öllum stigum í ráðningarferli hverju sinni.“

Að öllu þessu samanlögðu hljóti það að vera í verkahring Þingvallanefndar að taka ákvarðanir á öllum stigum í ráðningarferli þjóðgarðsvarðar. Það er mat Capacent að Þingvallanefnd hafi fengið faglega og haldgóða ráðgjöf.