Atvinnulíf

Fjórar helstu áskoranir fyrirtækja í kjölfar kórónufaraldurs

Rakel Sveinsdóttir skrifar
Óvissa einkennir atvinnulífið um allan heim í kjölfar kórónufaraldurs.
Óvissa einkennir atvinnulífið um allan heim í kjölfar kórónufaraldurs. Vísir/Getty

Rannsókn sem gerð var meðal 900 fyrirtækja í Bandaríkjunum á dögunum sýnir að stjórnendur telja helstu áskoranir fyrirtækja næstu missera helst vera fjórar: 

  1. Starfsmannaandinn 
  2. Vinnurými 
  3. Sala 
  4. Óvissa.

Í rannsókninni voru stjórnendur beðnir um að nefna helstu áskoranir og hvaða leiðir þeir teldu vænlegastar til að koma fyrirtækjunum í gegnum þær. Helstu niðurstöður voru eftirfarandi:

1. Starfsmannaandinn

Einkennandi í svörum stjórnenda voru upplýsingar um að starfsfólk væri almennt farið að finna verulega fyrir þreytu eftir margra mánaða heimsfaraldur. Kulnun, veikindi og viðvarandi áhyggjur eru farnar að segja til sín og víða er hægara sagt en gert að byggja upp stemningu þegar fólk er ýmist í fjarvinnu eða undir miklu álagi.

Stjórnendur sögðust flestir telja vænlegustu leiðina til að halda uppi góðum anda meðal starfsmanna væri að sýna fólki skilningi á aðstæðum og þá einna helst því að fólk þyrfti á góðri hvíld að halda frá vinnu. Ekki væri nóg að horfa til þess að fólk hefði farið í frí í sumar heldur þyrftu stjórnendur einnig að huga að fríum og hvíld frá vinnu á komandi haust og vetrarmánuðum.  Annars væri hætta á að viðvarandi álag í kjölfar faraldursins yrði of dýru verði keypt.

2. Vinnurýmin

Fjarlægðarmörk, spritt og sóttvarnir er hinn nýi veruleiki og allt í einu standa vinnustaðir frammi fyrir því að þurfa að endurskipuleggja öll svæði starfsmanna. Þá verður fjarvinna veruleiki víða.

Heilt yfir sögðust flestir stjórnendur telja að fólk myndi til framtíðar horfa sérstaklega til vinnustaða sem bjóða upp á fjarvinnu að hluta eða að öllu leyti. Þannig væri fjarvinnan komin til að vera. Hvert og eitt fyrirtæki þyrfti hins vegar að finna út úr því hvers konar fyrirkomulag hentaði þeim best og skapa aðstæður fyrir starfsfólk í samræmi.

3. Salan 

Í þeirri óvissu sem nú er uppi eiga menn víðast hvar erfitt með að spá fyrir um það hvernig salan eða rekstraráætlanir munu ganga eftir næstu mánuði og ár.

Hér kom fram í svörum að stjórnendur telja mikilvægast að gera nýjar þarfagreiningar og mæta þeim. Þetta þýðir að fyrirtæki þurfa að horfa til breyttra neysluvenja og aðlaga rekstur og þjónustu hjá sér miðað við þessar breytingar. 

Tæplega helmingur svarenda (48%) sögðu að fyrirtækin þeirra hefðu nú þegar boðið fram einhverjar nýjungar sem urðu til í kjölfar kórónufaraldurs. Helmingur þeirra sögðu breytingarnar vera komnar til að vera.

Þá kom fram að til að ná árangri í sölu þyrfti einnig að breyta áherslum í markaðsmálum því í dag ættu ekki endilega við sömu skilaboð til kaupenda og áður.

4. Óvissan

Hversu lengi mun ástandið vara, hvernig mun efnahagur samfélagsins þróast og hvaða áhrif mun faraldurinn hafa á markaðinn og virðiskeðjuna í heild sinni? Allt eru þetta áleitnar spurningar sem stjórnendur velta fyrir sér og gerir þeim erfitt um vik í áætlanaðgerð og ákvarðanatöku.

Í svörum sögðu stjórnendur að það eina í stöðunni væri að taka ákvarðanir miðað við þær upplýsingar sem fyrir liggja dag frá degi. Aðstæðurnar væru svo sannarlega að reyna á leiðtogahæfni stjórnenda en þar fælist lykilatriðið ekki síst í því að horfa á lausnir og nýjungar með opnum huga. Þá væri mikilvægt að stjórnendur hlusti á sem flest sjónarmið og reyni með því að temja sér ákveðna víðsýni við stjórnun.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×