Golf

McIlroy um titlaþurrðina: „Heldur ekki fyrir mér vöku“

Ingvi Þór Sæmundsson skrifar
Rory McIlroy á æfingu á TPC Harding Park í San Francisco þar sem PGA-meistaramótið fer fram.
Rory McIlroy á æfingu á TPC Harding Park í San Francisco þar sem PGA-meistaramótið fer fram. getty/Ezra Shaw

PGA-meistaramótið hefst í San Francisco í dag. Rory McIlroy fær þar tækifæri til að vinna sitt fyrsta risamót í sex ár.

McIlroy vann PGA-meistaramótið 2014 en síðan hefur enginn risamótstitill komið í hús hjá Norður-Íranum. Hann segir að titlaþurrðin leggist ekki þungt á hann.

„Ég hefði viljað vinna nokkur risamót á þessu tímabili. Mér finnst ég hafa átt góða möguleika til þess en hef ekki náð að klára dæmið. En þetta heldur ekki vöku fyrir mér,“ sagði McIlroy.

„Það góða er að ég hef þrjá möguleika í ár og fjóra ef allt fer aftur í eðlilegt horf. Það eru eiginlega sjö risamót á næstu tólf mánuðum svo það eru fullt af tækifærum fyrir mig.“

McIlroy, sem er í 3. sæti heimslistans, hefur átt erfitt uppdráttar eftir að keppni hófst á ný eftir hléið vegna kórónuveirufaraldursins. Á fimm mótum síðan þá hefur hann ekki endað ofar en í 11. sæti.

McIlroy fagnar sigrinum á PGA-meistaramótinu 2014.getty/Jeff Moreland

McIlroy hefur viðurkennt að hann eigi erfitt að einbeita sér þegar engir áhorfendur eru að fylgjast með.

„Auðvitað viljum við allir spila fyrir framan áhorfendur þannig að við upplifum þetta eins og alvöru risamót en við erum bara heppnir að spila á golfmótum á þessum tíma,“ sagði McIlroy.

„Það eru komin fimm mót síðan keppni hófst á ný svo ég ætti að vera búinn að aðlagast þessu. Ef það að spila golf fyrir framan enga áhorfendur er eitt af mínum mestu áhyggjuefnum, þá er allt í góðu.“

McIlroy endaði í 8. sæti á PGA-meistaramótinu í fyrra. Hann lék samtals á einu höggi yfir pari og var níu höggum á eftir sigurvegaranum, Brooks Koepka frá Bandaríkjunum. Hann vann PGA-meistaramótið einnig 2018 og getur því unnið það í þriðja sinn í röð um helgina.

Af fjórum sigrum McIlroys á risamótum hafa tveir komið á PGA-meistaramótinu: 2012 í Suður-Karólínu og 2014 í Kentucky.

Sýnt verður beint frá öllum fjórum keppnisdögunum á PGA-meistaramótinu á Stöð 2 Golf. Útsending hefst alltaf klukkan 20:00. Stöð 2 Sport er hluti af Sportpakkanum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.