Golf

McIlroy segir erfitt að einbeita sér án áhorfenda

Ingvi Þór Sæmundsson skrifar
Rory McIlroy stefnir á að vinna Memorial mótið í fyrsta sinn um helgina.
Rory McIlroy stefnir á að vinna Memorial mótið í fyrsta sinn um helgina. getty/Maddie Meyer

Rory McIlroy, efsti maður heimslistans í golfi, segir erfitt að einbeita sér á mótum þar sem engir áhorfendur eru viðstaddir.

Norður-Írinn er meðal keppenda á Memorial mótinu í Ohio sem hefst í dag. Engir áhorfendur verða á mótinu líkt og á öðrum mótum eftir að keppni á PGA-mótaröðinni hófst á ný eftir kórónuveirufaraldurinn.

„Mér finnst erfiðara að halda einbeitingu. Áhorfendur og stemmningin sem þeir mynda hjálpa þér að komast í rétt hugarástand,“ sagði McIlroy um upplifunina af því að spila fyrir framan enga áhorfendur.

„Fyrstu þrjár vikurnar reikaði hugurinn svolítið og það þurfti lítið til að missa einbeitinguna. Og ég gerði nokkur mistök vegna þess. Þetta getur farið í báðar áttir.“

Klippa: McIlroy á erfitt með að einbeita sér

McIlroy hefur unnið eitt mót á PGA-mótaröðinni á þessu tímabili, WGC-HSBC Champions mótið í Kína. 

Hann endaði í 11. sæti á Travelers mótinu um síðustu helgi. Collin Morikawa varð hlutskarpastur þar eftir að hafa sigrað Justin Thomas í bráðabana.

Endurkoma Tigers

Memorial mótið verður það fyrsta sem Tiger Woods keppir á eftir kórónuveirufaraldurinn, eða síðan hann keppti á Genesis Invitational í febrúar.

Enginn hefur unnið Memorial mótið oftar en Tiger, eða fimm sinnum (1999-2001, 2009, 2012). Ef hann hrósar sigri um helgina slær hann metið yfir flesta sigra á PGA-mótaröðinni. Þeir Sam Snead deila metinu sem eru 82 sigrar.

Bandaríkjamaðurinn Patrick Cantlay vann Memorial mótið í fyrra. Hann lék þá á nítján höggum undir pari og var tveimur höggum á undan Ástralanum Adam Scott.

Justin Thomas frá Bandaríkjunum er efstur á peningalista PGA-mótaraðarinnar. Bryson DeChambeau er annar og Webb Simpson þriðji. McIlroy er í 5. sætinu.

Sýnt verður frá öllum fjórum keppnisdögunum á Memorial mótinu á Stöð 2 Golf. Bein útsending frá fyrsta degi mótsins hefst klukkan 18:30 í kvöld.


Tengdar fréttir




Fleiri fréttir

Sjá meira


×