Engir atvinnuslátrar frá Nýja Sjálandi koma í sláturtíðina hjá Sláturfélagi Suðurlands á Selfossi í haust eins og undanfarin ár vegna kórónuveirunnar. Þá gengur illa að manna sláturtíðina því Íslendingar vilja helst ekki vinna við slátrun sauðfjár.
Haustslátrun sauðfjár hefst hjá Sláturfélagi Suðurlands á Selfossi föstudaginn 4. september en reiknað er með að slátra um 106.000 fjár í ár. Vegna ástandsins í heiminum vegna kórónuveirunnar koma engir slátrar, sem eru atvinnumenn í faginu frá Nýja Sjálandi til starfa á Selfossi eins og síðustu haust. Benedikt Benediktsson er framleiðslustjóri hjá Sláturfélag Suðurlands og hefur yfirumsjón með sauðfjárslátruninni.
„Þetta krefst töluvert mikils undirbúnings þetta árið út af þessari veiru, þannig að það er bara verið að vinna í því að fá starfsfólk og púsla því saman. Atvinnuslátrarnir frá Nýja Sjálandi munu ekki koma í haust, það er ekki hægt að koma því við en við höfum verið að fá einhverja níu til tíu slátrara frá landinu, auk nokkurra frá Póllandi.“
Benedikt segir að það þurfi að ráða um 120 starfsmenn sérstaklega í sláturtíðina en það hafi fáir sótt um og lítil sem engin stemming sé hjá Íslendingum að sækja um störf.
„Já, það gengur ekki vel að fá Íslendinga til starfa, það er mun erfiðara núna en oft áður þannig að við erum að fá fleiri erlendis frá. Ég bara veit ekki hvað veldur, ég hélt nú að það væri eitthvað af fólki á lausu þessa dagana,“ segir Benedikt.
