Foreldrar hvattir til að hætta notkun Thule Sleek

Ákveðið hefur verið að innkalla barnakerrur frá framleiðandanum Thule AB vegna fallhættu. Fólk er hvatt til þess að hætta að nota kerrurnar þangað til þær hafa verið lagaðar. Umræddar kerrur eru af gerðinni Thule Sleek, voru framleiddar á tímabilinu maí 2018 til september 2019 og dreift af fyrirtækinu Nordic Games Ltd á Íslandi.

Neytendastofa segir að sér hafi borist tilkynning um innköllunina frá sænska framleiðandanum. „Samkvæmt tilkynningunni kemur fram að handfang á barnakerrunni eigi í hættu á að losna frá grind kerrunnar sem geti haft fallhættu í för með sér fyrir barnið,“ segir í orðsendingu Neytendastofu.

Þar segir jafnframt að starfsmenn Thule ætli sér að hafa samband við neytendur sem hafa orðið fyrir áhrifum af gallanum í gegnum vefsíðu sína og með aðstoð dreifingaraðila. „Neytendastofa hvetur neytendur til að hætta notkun á barnakerrunni þangað til að úrbætur hafa verið gerðar,“ segir stofnunin.

Umræddar barnakerrur eru með tegundanúmerin 11000001 - 11000019.