Kvöld­fréttir Stöðvar 2

Önnur bylgja faraldursins á Íslandi myndi skapa grafalvarlega stöðu, að sögn yfirlæknis. Hann óttast að fólk sé orðið of værukært í persónubundnum smitvörnum.  Fjallað verður nánar um málið í kvöldfréttum Stöðvar 2 klukkan 18:30.

Ef fram heldur sem horfir er útlit fyrir að Hong Kong verði eins og hver önnur kínversk borg. Vesturlönd og margir íbúar borgarinnar hafa brugðist illa við nýrri öryggislöggjöf sem tryggir frekari yfirráð stjórnvalda í Kína yfir þessu sjálfstjórnarsvæði. Fjallað verður nánar um málið í kvöldfréttum.

Einnig verður rætt við formann Þroskahjálpar sem gagnrýnir áform Garðabæjar um að reisa tvo búsetukjarna fyrir fólk með fötlun í sama hverfinu. Mikilvægt sé að dreifa íbúðum fyrir fólk með fötlun svo það hafi val um búsetu.

Þá skoðum við óvenjulega sýningu á sælgæti sem opnuð var í Árbæjarsafni í dag og lítum á umferðina nú þegar ein stærsta ferðahelgi ársins er að hefjast. Þetta og margt fleira á samtengdum rásum Bylgjunnar, Stöðvar 2 og Vísis klukkan 18:30.