Innlent

Fimm greindust með veiruna í gær

Kristín Ólafsdóttir skrifar
Byrjað var að skima á landamærum 15. júní.
Byrjað var að skima á landamærum 15. júní. Vísir/Vilhelm

Tveir greindust með kórónuveiruna við landamæraskimun í gær. Beðið er eftir niðurstöðum úr mótefnamælingu og eru viðkomandi einstaklingar í einangrun á meðan. Þetta kemur fram í tilkynningu frá sóttvarnalækni og almannavörnum. 

Þá greindust einnig þrjú innanlandssmit í gær á veirufræðideld Landspítala í gær. Þegar var búið að greina frá umræddum smitum en þau má rekja til konu sem kom hingað til lands frá Albaníu í byrjun síðustu viku og eru því innanlandssmit. Öll þrjú voru í sóttkví við greiningu, að því er fram kom í kvöldfréttum Stöðvar 2 í gær, og eru nú í einangrun. 

Alls eru nú 13 manns með virk smit á Íslandi og fjölgar þeim um þrjú frá því í gær. Frá upphafi faraldurs hafa 1855 smit greinst á landinu. 438 eru í sóttkví og fækkar um tvo milli daga.

Þá segir í tilkynningu sóttvarnalæknis að þau sem hafa greinst með Covid-19 undanfarna daga við komu til landsins hafi öll farið eftir ráðleggingum sóttvarnayfirvalda eftir sýnatöku og takmarkað samneyti við annað fólk. 

„Það eykur öryggi almennings og auðveldar mjög alla vinnu við rakningu,“ segir í tilkynningu.

„Við brýnum fyrir fólki sem kemur að utan að hafa hægt um sig fyrstu daga eftir heimkomu og hafa samband við heilsugæslu ef það finnur fyrir einkennum.“

Alls eru sjö sem komið hafa erlendis frá með virk smit en 25 eru með mótefni og ekki smitandi. Tveir bíða eftir niðurstöðum. Innanlandssmit eru orðin ellefu og smit sem rekja má til útlanda eru 31. Upprunaland er óþekkt í þremur tilfellum, samkvæmt tölum af Covid.is.

Enginn upplýsingafundur vegna veirunnar verður haldinn í dag, líkt og verið hefur síðustu föstudaga. Næstu upplýsingafundir almannavarna verða haldnir þriðjudaginn 7. júlí og fimmtudaginn 9. júlí.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.