Innlent

Lögregluþjónninn bróðir Elliða kallaður svín, morðingi og ógeð

Jakob Bjarnar skrifar
Elliði og Svavar Vignissynir hafa heldur betur staðið í ströngu á samfélagsmiðlinum Facebook í vikunni.
Elliði og Svavar Vignissynir hafa heldur betur staðið í ströngu á samfélagsmiðlinum Facebook í vikunni.

Svavar Vignisson lögreglumaður í Vestmannaeyjum hefur séð sig knúinn til að ávarpa sérstaklega þá sem hafa að undanförnu farið um hann ófögrum orðum:

„Sæl verið þið. Svavar Vignisson heiti ég og er lögreglumaður og bróðir Elliða (eins og kannski flestir vita í eyjum ). Facebook status með mynd af mér hefur farið eins og eldur um sinu undanfarna daga ( ef ég hefði vitað það hefði ég verið á innsoginu ) og hef ég verið kallaður ýmsum frekar ljótum nöfnum allt frá því að fólki verði óglatt af henni, svín, morðingi ofl. Ég tek því ekki persónulega, grunar að það snúi að starfi mínu frekar en mér,“ skrifar Svavar á Facebooksíðu sína. Færsla hans hefur vakið mikla athygli.

Forsaga málsins er sú að Elliði Vignisson bæjarstjóri í Ölfusi birti í vikunni afar umdeilda stutta Facebookfærslu þar sem hann þótti, að mati margra, vera með afar hæpinn og ósmekklegan samanburð:

„Um allan heim mótmælir fólk nú eðlilega ofbeldi lögreglu í USA í garð almennings. Hér á Íslandi glímum við við ofbeldi almennings gagnvart lögreglu. #gerumbetur“

Elliði fær það óþvegið

Þarna blandar Elliði saman frétt sem vakti mikla athygli og segir af því að lögreglumenn hafi verið sviptir frelsi sínu og svo mótmælum í Bandaríkjum þar sem morðinu á George Floyd hefur verið mótmælt. Svo er gengið fram af fólki að víða hefur soðið uppúr.

Með færslunni birti Ellið mynd af bróður sínu Svavari, sem eins og áður sagði, starfar sem lögreglumaður. Orð Elliða féllu í grýttan jarðveg svo vægt sé til orða tekið. Fyrst til að taka til máls í athugasemd var Heiða B. Heiðars fyrrverandi auglýsingastjóri Stundarinnar:

„Þú ættir að eyða þessu í einum hvelli. Þetta er það vandræðalegasta sem nokkur manneskja hefur sett á facebook. Þú hlýtur að geta komið þessum skilaboðum áleiðis á smekklegri hátt.“ Þessi orð Heiðu fengu vel á 400 læk, eins og það heitir og þykir mikið. Í kjölfarið fylgdi strollan sem fordæmdi Elliða og voru lögreglunni ekki vandaðar kveðjurnar.

Aldrei óviðeigandi að benda á ofbeldi

Svavar gerir þetta að umtalsefni á Facebooksíðu sinni:

„Mér þykir hins vegar sárt að sjá það viðhorf sem kemur fram í mörgum „komentum“ á þræði Elliða. Þau skýra ef til vill að einhverju leiti starfsumhverfi okkar. Ég hef unnið margskonar störf í gegnum tíðina. Man ekki áður til að vera kallaður „svín“, „morðingi“, „ógeð“ og margt sambærilegt eins og sumir gera,“ segir Svavar meðal annars í pistli sínum.

Svavar bendir jafnframt á að lögreglumenn vinni oft erfiða vinnu en hann vilji ekki kvarta undan því. Hann telur sig og kollega sína geta gert betur. En staðreyndin sé hins vegar sú, eins og fram kom í athugasemd Elliða, að lögreglumenn hér á landi verði oft fyrir ofbeldi. Það er aldrei óviðeigandi að benda á ofbeldi, sama hver gerandinn er og sama hver þolandinn er.


Tengdar fréttir

Geor­ge Floyd hafði greinst með Co­vid-19

Í krufningaskýrslu kemur fram að kórónuveirusmitið hafi ekki átt þátt í dauða George Floyd, en áður hefur verið greint frá því að Floyd hafi látist af völdum köfnunar.

Fimm lögreglumenn skotnir í mótmælum vestanhafs

Að minnsta kosti fimm lögreglumenn eru sagðir hafa orðið fyrir byssukúlum í mótmælum vegna dauða blökkumanns í haldi lögreglu í gærkvöldi. Lögreglumennirnir eru ekki taldir lífshættulega særðir. Donald Trump Bandaríkjaforseti hefur hótað því að beita hernum til að stöðva mótmæli og óeirðir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×