Viðskipti innlent

Starfs­fólk Icelandair taki á sig tíu prósenta launa­skerðingu eða lækki starfs­hlut­fall

Atli Ísleifsson skrifar
Icelandair vinnur nú að því að leggja félaginu til 29 milljarða kórna í nýtt hlutafé.
Icelandair vinnur nú að því að leggja félaginu til 29 milljarða kórna í nýtt hlutafé. Vísir/Vilhelm

Icelandair hefur boðið starfsfólki félagsins sem er á taxtalaunum að lækka tímabundið starfshlutfall í 90 prósent og öðrum að taka á sig tíu prósenta launalækkun.

Heimildir fréttastofu herma að póstur þessa efnis hafi verið sendur frá yfirmönnum til starfsmanna í morgun, en RÚV greindi fyrst frá málinu.

Icelandair grípur til þessa aðgerða þar sem félagið geti ekki nýtt sér hlutabótaleið stjórnvalda áfram. Í nýrri skýrslu Ríkisendurskoðunar sem birt var í fær kom fram að Icelandair hafi fengið mest allra þeirra fyrirtækja sem hafi nýtt sér úrræðið. Nam heildargreiðsla vegna hlutabóta til starfsmanna móðurfélags flugfélagsins, Icelandair Group, 1.116 milljónum króna vegna 3.318 starfsmanna.

Ekki kemur fram um ástæður þess að félagið geti ekki nýtt sér hlutabótaleiðina áfram, en ljóst er að breytingar verði gerðar á leiðinni þar sem kveðið verði á um bann við arðgreiðslur til hluthafa næstu þrjú árin.

Icelandair fyrirhugar hlutafjárútboð í lok næsta mánaðar til að afla allt að 30 milljarða króna í nýju hlutafé.

Fréttastofu hefur ekki tekist að ná tali af Boga Nils Bogasyni forstjóra eða Ásdísi Ýr Pétursdóttur upplýsingafulltrúa Icelandair vegna málsins.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×