Play nægi­lega fjár­magnað og stefnir á að fljúga í haust

Flugfélagið Play er nægilega vel fjármagnað og er stefnt á að hefja flug í síðasta lagi í haust sagði Arnar Már Magnússon, forstjóri Play, í Reykjavík síðdegis í dag. „Það hefur gengið mjög vel, við höfum nýtt síðustu vikur og mánuði í lokaundirbúning,“ bætti hann við.

Félagið er með 36 starfsmenn í dag og segir Arnar að félagið hafi byggt upp starfslið hægt og rólega síðan síðasta haust. „Blessunarlega tafðist það örlítið hjá okkur þannig að við verðum betur í stakk búin þegar flugsamgöngur hefjast af alvöru á ný.“ Hann segir flugrekstrarleyfið ekki komið í hús en von sé á því von bráðar.

„Öll vinna á bak við það er búin en það er í þessu eins og svo mörgu sem tengist þessu Covid að það hefur örlítið tafist en á góðum stað. Við vinnum mjög náið með samgöngustofu í þeim efnum,“ segir Arnar.

„Hjá okkur, eins og flestum, er rosalega erfitt að spá til um það [hvenær byrjað verður að fljúga] akkúrat eins og staðan er núna en við erum með margar sviðsmyndir uppi sem að taka á því hvenær fyrsta flug verður en við erum í grunninn tilbúin til þess.“

„Við erum búin að vera í þessu verkefni núna í rúmt ár. Það hefur tekið svo sannarlega á en með þessu kraftmikla og frábæra starfsfólki sem er innan raða Play þá hefur þetta gengið óskaplega vel undanfarnar vikur.“

Margir innan raða Play eru fyrrverandi starfsmenn WOW Air og segir Arnar að byggt sé á þeirri reynslu sem aflað var hjá WOW. „Já, við byggjum á þeirri reynslu. Hér inni er fólk með mikla flugrekstrarþekkingu. Það góða hér hjá okkur er að við höfum aðgang að frábæru starfsfólki sem er með réttindi á þessa flugvél og hyggjumst við nýta það enda er þetta frábær vél inn í þetta leiðakerfi,“ segir hann.

Arnar segir að allt liggi fyrir hvað varðar kjarasamninga við framtíðar starfsmenn. „Við höfum samið við stéttarfélag um alla þessa samninga, bæði flugmenn og flugliða.“

Þá segir hann að félagið sé búið að tryggja sér vélar sem verða leigðar. „Það hefur verið upp og ofan í gegn um tíðina en aðgangur að flugvélum í þessu árferði hefur batnað gríðarlega og við erum að horfa fram á mjög flottan framtíðarflugvélaflota.“

Félagið mun byrja með eina flugvél en Arnar segir að staðan sé þannig að hægt verði að fjölga þeim að vild. Þá segir hann að leiðakerfið sé tilbúið og það sé búið að kynna en nú muni þurfa að greina betur stöðuna á mörkuðum erlendis og sjá hvert verði fyrst flogið og hvernig verði byrjað.

Hann segir stöðuna á íslenskum flugmarkaði grafalvarlega. „Ég vil ekki beint fara í stöðu Icelandair. Við höfum svo sannarlega mörg hér gengið í gegn um svona erfiðleika og óskum þeim alls hins besta og vonandi gengur þetta vel. Við erum fyrst og fremst að einbeita okkur að okkur sjálfum og koma okkur af stað og tryggja þannig samkeppni fyrir íslenska neytendur.“