Fundi með flugfreyjum frestað áður en hann hófst

Fundi samninganefnda Flugfreyjufélags Íslands og Icelandair sem til stóð að hæfist klukkan fimm hefur verið frestað.

Samkvæmt upplýsingum fréttastofu eru viðræðurnar á afar viðkvæmu stigi. Ekki er búið að finna nýjan tíma fyrir fundarhöld en líklega verður það ekki fyrr en í fyrsta lagi á morgun.

Samninganefndirnar funduðu stíft í ellefu klukkustundir í gær en ríkissáttasemjari ákvað að slíta fundi klukkan eitt í nótt.

Icelandair freistar þess að safna allt að 29 milljörðum króna í hlutafjárútboð. Fjárfestar gera kröfu um langtímasamninga við fagstéttir fyrirtækisins. Samninganefnd Icelandair fer fram á aukið vinnuframlag af hálfu flugfreyja fyrir sömu laun.