Keyrð 30 kílómetra leið í skólann

Grunnskólakennslu hefur verið hætt á Kópaskeri og eru börnin nú keyrð 30 kílómetra leið í sveitaskóla. Bænaskjöl og kærumál heimamanna gegn þessari ráðstöfun hafa engu breytt.

Skólabíllinn er að renna inn á Kópasker. 23 börn eru að koma heim úr skólanum, búin að keyra í rútunni alls 60 kílómetra þennan daginn. Það skrýtna er að rútan stoppar beint fyrir utan veglegt hús, sem þar til í haust var grunnskóli Kópaskers og helsta stolt byggðarinnar.

Þar hlaupa ekki lengur ærslafullir skólakrakkar um ganga og er nema von að María Hermundardóttir, formaður Samtaka velunnara Kópaskersskóla, segi það blóðugt. Hún segir fimm störf við skólann hafa tapast úr þorpinu, og eigendur einu verslunarinnar á staðnum brugðust við í haust með því að loka og flytja suður. Reyndar ákváðu önnur hjón að taka við keflinu og opna búðina á ný.

Nærri 200 manns bjuggu á Kópaskeri þegar mest fyrir aldarfjórðungi, um það leyti sem skólinn var byggður, en hefur síðan fækkað niður í 130.

Sveitarstjórn Norðurþings, með höfuðstöðvar á Húsavík, ákvað í vor að reka einungis grunnskólann að Lundi fyrir Öxarfjörð, Kópasker og Kelduhverfi. Á þessu stóra svæði eru nú einungis 48 börn á grunnskólaaldri, voru 74 fyrir fáum árum, og Lundur var valinn af því hann er miðsvæðis.

Faglegar ástæður virðast ekki síður hafa ráðið ákvörðun en fjárhagslegar, að það væri betra fyrir velferð barnanna að hafa þau saman í einum skóla, enda hefðu aðeins 13 börn verið í skólanum á Kópaskeri í vetur að óbreyttu, sem var bara fyrir fyrsta til sjöunda bekk.

Kópaskersbúar hafa skrifað sveitarstjórninni, safnað undirskriftum og kært til ráðuneytis, allt án árangurs, og næst á kæra til umboðsmanns Alþingis. Það breytir þó litlu um kjarna þessa máls, sem er stórfelld fækkun barna í héraðinu, eins og víðast hvar í dreifbýlinu.