Bæjarstjórinn í Garði vill á þing

Oddný Harðardóttir, bæjarstjóri í Garði, hefur ákveðið að gefa kost á sér í 2. sæti í prófkjöri Samfylkingarinnar í Suðurkjörkjördæmi.

,,Að undanförnu hefur verið skorað á mig að gefa kost á mér í prófkjör Samfylkingarinnar i Suðurkjördæmi. Hvatning til þessa hefur komið alls staðar að úr kjördæminu og fyrir það er ég þakklát. Ég hef ákveðið að svara þessu eindregna kalli og bjóða mig fram í 2. sæti listans," segir Oddný.

,,Erfið úrlausnarefni bíða í flókinni stöðu efnahagsmála og leitað er eftir nýju fólki til að leggjast á árarnar," segir Oddný og bætir við að þau verkefni verði að leysa með jöfnuð, samvinnu og samhjálp að leiðarljósi. ,,Til þess er ég reiðubúin og mun ganga ötullega til verka fyrir Suðurkjördæmi og landið allt, hljóti ég til þess brautargengi."