Munu hýsa samfélag á stærð við Seyðisfjörð

Á byggingartíma stærsta hótels Íslands, Fosshótels Reykjavík við Höfðatorg, þurftu Veitur, dótturfélag Reykjavíkur, að koma fyrir miklum mun afkastameiri fráveitulögn vegna umsvifanna. Ekki að furða þar sem hótelið fullskipað, og þá er starfsfólkið ótalið, getur hýst alla íbúa Seyðisfjarðarbæjar.

Íris Þórarinsdóttir, verkfræðingur og tæknistjóri fráveitu hjá Veitum, segir að hingað til þekki hún ekki dæmi þess að Veitur hafi áður þurft að grípa til sérstakra ráðstafana í fráveitu vegna einnar byggingar í borginni – hins vegar sé stærð hótelsins slík að upp kom þessi óvenjulega staða, fyrir svo utan mikla uppbyggingu íbúðarhúsnæðis í hverfinu því til viðbótar.

Um mikla framkvæmd var að ræða og kostnaðurinn var í kringum 100 milljónir króna, en á þá við um tvær aðrar byggingar sem tengjast inn á sömu lögnum – annað þeirra er Storm Hótel sem er nýbyggt og 93 herbergja. Hins vegar sé ekki ólíklegt að vegna hitaveitu og rafmagns hafi áður þurft að grípa til mjög kostnaðarsamra fjárfestinga vegna einstakra bygginga.

„Við höfum hins vegar ekki áhyggjur af uppbyggingu hótela miðsvæðis í Reykjavík, þau eru einfaldlega ekki af þessari stærð, öfugt við hótelið við Höfðatorg sem jafnast á við meðalstórt sveitarfélag,“ segir Íris en þétting byggðar í Reykjavík, sem lögð er áhersla á af borgaryfirvöldum, mun þó óumflýjanlega hafa áhrif á fráveituna og með frekari uppbyggingu, þar á meðal fjölda hótela miðsvæðis í Reykjavík, má reikna með að gera þurfi ráðstafanir.

Það er engu logið um stærð Fosshótels Reykjavík, sem tók á móti fyrstu gestum sínum í sumarbyrjun í fyrra. Herbergin eru 320 talsins; á efstu hæð má finna sjö svítur og þrjá fyrsta flokks fundarsali á annarri hæð. Á hótelinu er veitingastaðurinn Haust sem tekur rúmlega 200 manns í sæti. Bjórgarðinn er einnig að finna á jarðhæð hótelsins.

Samkvæmt upplýsingum frá Davíð Torfa Ólafssyni, framkvæmdastjóra Íslandshótela, þá getur hótelið skotið skjólshúsi yfir 650 gesti, en ef starfsmenn eru meðtaldir þá er hótelið fullbókað 780 manna samfélag. Seyðfirðingar voru 665 talsins um áramótin 2014.